Rajya Geet : शिवसेना कार्यालयाबाहेर राज्यगीत वाजविणे बंधनकारक

नाशिक : ‘जय जय महाराष्ट्र माझा’ या गाण्याला राज्य सरकारने राज्यगीताचा दर्जा दिला आहे. त्याअनुषंगाने १९ फेब्रुवारीला जेथे-जेथे शिवजयंती साजरी केली जाईल, तेथे राज्यगीत वाजविणे बंधनकारक करण्यात आले आहे.

राज्य शासनाने काढलेल्या नवीन आदेशात ही बाब नमुद करण्यात आल्याने बाळासाहेबांच्या शिवसेना सरकारने काढलेले आदेश उद्धव बाळासाहेब ठाकरे शिवसेनेलादेखील बंधनकारक असल्याने शिवसेना भवन समोर देखील राज्यगीत वाजविणे बंधनकारक राहणार आहे. (mandatory to play state anthem outside Shiv Sena office nashik news)

शासनामार्फत दरवर्षी १९ फेब्रुवारीला छत्रपती शिवाजी महाराज यांची शासकीय कार्यालयात जयंती साजरी करण्यात येते. तसेच पुतळे, स्मारके आहेत तेथेदेखील छत्रपती शिवाजी महाराजांची जयंती होते.

त्याअनुषंगाने राज्य शासनाने विशेष सूचना जारी केल्या. त्यात पुतळा परिसराची पाहणी करून रंगरंगोटी, साफसफाई व सुशोभीकरण करण्याच्या सूचना आहेत. त्याचबरोबर १ फेब्रुवारीपासून राज्यगीत जाहीर केले आहे.

हेही वाचा : हिंडेनबर्ग अहवालाचा फटका भाजपला भविष्यात बसणार?

छत्रपती शिवाजी महाराज जयंतीचे औचित्य साधून प्रत्येक ठिकाणी राज्यगीत वाजविणे बंधनकारक करण्यात आले आहे. शासकीय कार्यालयांच्या ठिकाणी शिवजयंतीला राज्यगीत वाजविण्यासाठी विशेष सूचना देण्यात आल्या आहेत.

जयंतीच्या ठिकाणी महाराष्ट्र राज्याच्या राज्यगीताचे गायन करून सर्व संबंधित वरिष्ठ अधिकारी व संबंधित कार्यालय प्रमुखांनी प्रतिमेस पुष्पहार अर्पण करावे. त्यानंतर छोटेखानी सांस्कृतिक समारंभाचे आयोजन करावे असे आदेशात म्हटले आहे.

सार्वजनिक ठिकाणी जेथे शिवजयंती साजरी होईल तेथे राज्यगीत सादर करणे बंधनकारक असल्याने शिवसेनेलादेखील मुख्यमंत्री एकनाथ शिंदे यांचे आदेश मानणे बंधनकारक राहणार आहे.