Nashik : आमदार निलेश लंके धावले अपघातग्रस्ताच्या मदतीला

सिन्नर (जि. नाशिक) : जनमानसाप्रती तळमळ असलेला कार्यकर्ता ते लोकनेता अशी ओळख असलेल्या पारनेर विधानसभा क्षेत्राचे आमदार निलेश लंके (MLA Nilesh Lanke) यांनी गुरुवारी दि.14 दुपारी नाशिक पुणे महामार्गावर सिन्नर जवळ झालेल्या अपघातातील (Accident) दुचाकीस्वारास स्वतःच्या वाहनातून रुग्णालयात नेत त्याचे प्राण वाचवले. बेशुद्ध पडलेल्या या रुग्णासाठी ते तब्बल दोन तास रुग्णालयातच थांबून होते. (MLA nilesh Lanke rushed to help accident victim nashik Latest Marathi News)

नाशिक-पुणे महामार्गावर माळेगाव औद्योगिक वसाहती जवळच्या एल अँड टी फाट्यावर ट्रकने समोरून धडक दिल्याने निफाड तालुक्यातील धारणगाव विर येथील रहिवाशी कल्याण शिवाजी सानप (42 ) या दुचाकीस्वारास अपघात झाला होता.

या अपघातात नाशिकहून सिन्नरकडे येणाऱ्या श्री सानप यांच्या डोक्याला व पायाला गंभीर दुखांबत होऊन रक्तस्राव होत होता. अपघात झाला त्याच क्षणाला नाशिकहून पारनेरच्या दिशेने आमदार निलेश लंके जात होते. त्यांनी अपघात पाहून आपले वाहन थांबवले.

जखमी दूचाकीस्वाराची विचार करून त्याला धीर दिला. मात्र अतिरक्तस्राव झाल्याने सदर जखमी व्यक्ती बेशुद्ध झाली होती. सिन्नरचे माजी नगरसेवक हर्षद देशमुख यांच्याशी भ्रमणध्वनीवरून संपर्क साधत आमदार लंके यांनी देशमुख यांना अपघाताची माहिती दिली. व सिन्नर मधील चांगले रुग्णालय कुठे आहे याबाबत विचारणा केली.

श्री. देशमुख यांनी आपण अपघात स्थळी जखमी व्यक्तीस नेण्यासाठी रुग्णवाहिका पाठवतो असे सांगितले. मात्र, आमदार लंके यांनी रुग्णवाहिका येण्याची वाट न बघता जखमी अवस्थेतील श्री. सानप यांना उचलून आपल्या वाहनात घेतले. व देशमुख यांनी सांगितलेल्या रुग्णालयात उपचारासाठी आणले.

डोक्याला गंभीर दुखापत होऊन रक्तस्राव झाल्याने जखमी झालेल्या श्री. सानप यांची शुद्ध हरपली असल्याने त्यांना रुग्णालयात दाखल केल्यानंतर आमदार लंके तेथेच तब्बल दोन तास थांबून होते. रुग्णालयात आलेल्या सानप यांच्या नातेवाईकांनाही त्यांनी धीर दिला. जखमी सानप यांच्यावर योग्य पद्धतीने उपचार करा. आवश्यकता असेल तर नाशिकच्या रुग्णालयात पाठवा अशी सूचना देऊन आमदार लंके पुढच्या प्रवासाला रवाना झाले.