महापालिकेच्या स्वच्छतेचा ठेका रद्द करण्याच्या हालचाली; कर्मचाऱ्यांचा आयुक्त दालनांसमोर ठिय्या

नाशिक : महापालिकेतर्फे पूर्व व पश्‍चिम विभागात रस्त्यांची झाडलोट करण्यासाठी नियुक्त केलेल्या ७०० स्वच्छता कर्मचाऱ्यांना अदा केल्या जाणाऱ्या वेतनामध्ये ठेकेदाराकडून परस्पर मोठ्या प्रमाणात कपात केली जात आहे. पंधरा हजार रुपये अनामत रक्कम परत केली जात नसल्याने ठेका रद्द करण्याच्या हालचाली सुरू झाल्या आहेत. मे. वॉटर ग्रेस कंपनीसंदर्भातील सविस्तर अहवाल स्थायी समितीवर सादर करण्याच्या सूचना देण्यात आल्या आहेत. पुढील महिन्यापासून कामकाज बंद होण्याची दाट शक्यता व्यक्त केली जात आहे. 

शहरात कंत्राटी पद्धतीने स्वच्छतेचा ठेका देण्यात आला. मे. वॉटरग्रेस लिमिटेड या कंपनीकडून चार महिन्यांपासून काम सुरू असले तरी निविदाप्रक्रिया राबविण्यापासून ठेका वादात आहे. कंत्राटदार कंपनीने चुकीची माहिती देऊन ठेका पदरात पाडून घेतला आहे. कार्यारंभ आदेश मिळाल्यानंतर भरतीप्रक्रिया राबविण्यात आली. त्या वेळी पंधरा ते पंचवीस हजार रुपये अनामत रक्कम इच्छुक उमेदवारांकडून घेण्यात आली. याविरोधात आवाज उठल्यानंतर आरोग्य विभागाच्या संचालिका डॉ. कल्पना कुटे यांनी नोटीस बजावत अनामत रक्कम परत करण्याच्या सूचना दिल्या होत्या. सूचनेला केराची टोपली दाखवून भरती करण्यात आली. नियमित काम सुरू झाल्यानंतर महापालिकेकडून वेतन पदरात पाडून घेतले. नियमाप्रमाणे २७ हजार रुपये वेतन स्वच्छता कर्मचाऱ्यांना मिळणे अपेक्षित असताना प्रत्यक्षात हातात साडेबारा हजार रुपये मिळत असल्याचा आरोप करण्यात आला. याविरोधात काँग्रेसच्या डॉ. हेमलता पाटील यांनी उच्च न्यायालयात धाव घेतली असून, पंतप्रधान नरेंद्र मोदी यांच्याकडे तक्रार केली आहे.

हेही वाचा > नाशिकच्या गुलाबी थंडीत हॅलिकॉप्टरने अचानक आमीर खानची एंट्री होते तेव्हा..!..

अनियमितता आढळल्यास ठेका रद्द

स्थायी समितीच्या मंगळवारच्या बैठकीत पुन्हा हा विषय चर्चेला आला. अनामत रक्कम स्वच्छता कर्मचाऱ्यांना मिळाली नाही. नियमित वेतनामध्ये आठ ते दहा दिवसांच्या सुट्ट्या पकडून कपात केली जात असल्याचा आरोप सदस्यांनी केला. कमलेश बोडके, कल्पना पांडे, सुनीता कोठुळे, स्वाती भामरे, वर्षा भालेराव, प्रा. शरद मोरे यांनी कामामधील अनियमितता, ठेकेदाराची मुजोरी व कर्मचाऱ्यांची लूट होत असल्याचा आरोप करत ठेका रद्द करण्याची मागणी केली. स्थायी समिती सभापती गणेश गिते यांनी सविस्तर अहवाल सादर करण्याच्या सूचना देताना अनियमितता आढळल्यास ठेका रद्द करण्याची कारवाईचे आश्‍वासन दिले. 

हेही वाचा > जिल्हाधिकारी चक्क कार्यालय सोडून 'जोडप्याला' भेटतात तेव्हा..!...

आयुक्तांच्या वाहनाला घेराव 

सफाई ठेक्यावरून नगरसेवक आक्रमक झाले असताना मंगळवारी सायंकाळी वाल्मीकी मेघवाळ, मेहतर समाज संघटनेने आयुक्त दालनांसमोर ठिय्या दिला. स्वच्छतेचा ठेका रद्द करावा, कायम कर्मचाऱ्यांच्या अन्यायकारक बदल्या रद्द कराव्या, या मागण्या करण्यात आल्या. सुरेश मारू यांनी आंदोलनाचे नेतृत्व केले. आयुक्त जाधव यांच्या वाहनाला घेराव घालण्याचा प्रयत्न आंदोलनकर्त्यांनी केला. स्थायी समिती सभापती गणेश गिते, नगरसेवक मुकेश शहाणे यांनी मध्यस्ती केली. चर्चेअंती आयुक्त जाधव यांनी मागण्या काही प्रमाणात मान्य करताना परिस्थिती पूर्वपदावर आणण्याचे आश्‍वासन दिल्याने एकंदरीतच ठेक्याबद्दल प्राप्त झालेल्या तक्रारीवरून ठेका रद्द होण्याची दाट शक्यता निर्माण झाली आहे.