नारोशंकराची घंटा : चर्चा होईल हो, पण सत्कार महत्त्वाचे!

एखादा कार्यक्रम म्‍हटला, की सारे सोपस्‍कार आलेच. त्‍यातही सर्वांत जिव्‍हाळ्याचा सोपस्‍कार म्‍हणजे उपस्‍थितांचा सत्‍कार.

नुकताच एक कार्यक्रम झाला, त्‍यात सत्‍कारासाठीचा आग्रह गौरवाचा कमी अन्‌ विनोदाचा विषय जास्‍त वाटत होता. शिक्षकांशी निगडित या कार्यक्रमात लोकप्रतिनिधी आणि शिक्षण विभागातील अधिकारीवर्ग उपस्‍थित होते. नियोजित वेळेपेक्षा उशिराने कार्यक्रम सुरू झाला.

बरं आता उपस्‍थितांचा विचार करून ज्‍यासाठी कार्यक्रम आयोजित केला आहे, त्यावर चर्चा होणे अपेक्षित होते. पण, सूत्रसंचालकांकडून कार्यक्रमाच्‍या सुरवातीलाच सत्‍काराचा आग्रह धरण्यात आला. लोकप्रतिनिधींनी आता सत्‍कार नको, थेट चर्चा सुरू करू म्‍हणून आग्रह धरला.

हेही वाचा : ..ही काळजी घ्या नाहीतर खिसा होईल साफ!

पण ऐकतील ते आयोजक कसले. शेवटी लोकप्रतिनिधींनी शाल, पुष्पगुच्‍छ स्‍वीकारला. इतक्‍यावर थांबून चर्चा सुरू होणे अपेक्षित होते. पण त्‍यानंतर लोकप्रतिनिधींच्‍या हस्‍ते अधिकाऱ्यांच्‍या सत्‍काराची घोषणा केली अन्‌ या दरबारात चर्चा कमी अन्‌ सत्‍कार फार, अशी चर्चा उपस्‍थित शिक्षकांमध्ये रंगली होती.