Nashik News : मालेगावात 40 टक्के गटारी स्वच्छ; उर्वरित काम 15 दिवसात पूर्ण करणार

मालेगाव : महापालिका हद्दीत २२ एप्रिलपासून सुरु झालेली विशेष स्वच्छता मोहीम कायम असून आतापर्यंत ४० टक्के गटारींची स्वच्छता करण्यात आली आहे. कडक उन्हामुळे स्वच्छतेचे काम सकाळी साडेपाच ते दुपारी बारा या वेळेत केले जात आहे. भल्या पहाटेपासून स्वच्छता कर्मचारी रस्त्यावरचा केरकचरा उचलत आहेत. (40 percent sewage clean in Malegaon)

या कामासाठी ४५० स्वच्छता कर्मचारी कार्यरत आहेत. आणखी पंधरा दिवसात हे काम पूर्ण होण्याची शक्यता आहे. गटारींची साफसफाई झाल्यानंतर नाले स्वच्छ केले जाणार आहेत. शहरातील घाण, कचरा व अस्वच्छतेसंदर्भात सातत्याने तक्रारी असतात. त्यांची दखल घेत महापालिका आयुक्त रवींद्र जाधव यांनी १८ एप्रिलला सर्व विभागप्रमुखांची आढावा बैठक घेतली.

त्यातील निर्णयानुसार चारही प्रभागांमध्ये २२ एप्रिलपासून विशेष स्वच्छता मोहीम राबविण्याचा निर्णय घेण्यात आला. पहिल्या पंधरा दिवसात शहरातील ४० टक्क्यापेक्षा अधिक गटारींची स्वच्छता करण्यात आली. तुंबलेल्या गटारी वाहत्या करण्यात आल्या आहेत. गटारीतून काढलेली घाण लागलीच ट्रॅक्टरमधून वाहून नेली जात आहे. गटारी वाहत्या झाल्याने डासांचे प्रमाण देखील कमी झाले आहे. (Latest Marathi News)

विविध भागामधील गटारांवर अतिक्रमण करण्यात आले आहे. यातील काही ठिकाणचे अतिक्रमण काढण्यात आले. त्यामुळे गटारी खोलवर स्वच्छ होत आहेत. कायमस्वरूपी तुंबणाऱ्या गटारी वाहत्या झाल्याने नागरीकांनी मोहिमेचे स्वागत केले आहे. विशेष स्वच्छता मोहिमेसाठी दोन टप्पे करण्यात आले आहेत. प्रभाग एक व तीन यांचा पहिला तर प्रभाग दोन व चार यांचा दुसरा टप्पा आहे.

"महापालिका हद्दीतील विशेष स्वच्छता मोहीम आणखी काही दिवस सुरु राहील. गटारी स्वच्छतेचे काम पूर्ण झाल्यानंतर नाल्यांची सफाई केली जाईल. स्वच्छता मोहीम यशस्वितेची जबाबदारी कर्मचाऱ्यांबरोबरच अधिकाऱ्यांवर सोपविण्यात आली आहे. शहरवासीयांनी घाण, कचरा गटारात टाकू नये. स्वच्छता मोहिमेसाठी महापालिका प्रशासनाला सहकार्य करावे."

- रवींद्र जाधव, आयुक्त, मनपा मालेगाव.