Nashik Fire Accident : सातपूरला इलेक्ट्रिक दुचाकी मॅन्युफॅक्चरिंग कंपनी भस्मसात

Nashik Fire Accident : येथील अंबड लिंक रोडलगत बजरंग नगरमधील इलेक्ट्रिक दुचाकी बनवणाऱ्या कंपनीला भीषण आग लागून कंपनी भस्मसात झाल्याची घटना शनिवारी (ता.१६) घडली. बजरंग नगरमध्ये भाडेतत्त्वावरील गोडाऊनमध्ये मानसा ऑटोमेशन इलेक्ट्रिक मॅन्युफॅक्चरिंग कंपनीमध्ये इलेक्ट्रिकल दुचाकी बनवल्या जातात. या गोडाऊनला शनिवारी दुपारी साडे तीनच्या सुमारास भीषण आग लागली. (Nashik Accident electric two wheeler manufacturing company was gutted by massive fire)

शनिवार असल्याने कंपनीला सुट्टी होती. त्यामुळे घटना घडली तेव्हा घटनास्थळी कोणीही कर्मचारी उपस्थित नव्हते. त्यामुळे कोणतीही जीवित हानी झाली नाही. दुपारी पावणे चार वाजेच्या सुमारास आग लागल्याची माहिती सातपूर अग्निशमन केंद्रास स्थानिक व्यक्तीने कळवली.

सातपूर अग्निशमन केंद्राच्या बंबाने आग नियंत्रणात येत नसल्याने सिडको, अंबड, पंचवटी आदी विभागांच्या अग्निशमन बंबांच्या सह्याने सायंकाळी साडेपाच वाजेच्या सुमारास आगीवर नियंत्रण मिळवले. शॉर्ट सर्किटमुळे आग लागल्याचे शक्यता वर्तविण्यात आली आहे. आगीत लाखो रुपयाचे नुकसान झाले आहे.

कंपनीचे मालक हिमांशू रवींद्र केडिया हे घटना घडली त्यादिवशी बाहेरगावी गेले होते. हिमांशू यांनी संदीप फाउंडेशनमधून इंजिनिअरिंग पूर्ण करून मॅन्युफॅक्चरिंग स्टार्ट अप ऑटोमोबाईल कंपनी स्थापना करण्याचे स्वप्न असल्याने त्यांनी दोन वर्षांपूर्वी ही कंपनी सुरु केली होती.

कंपनी यशस्वी होत असतानाच आगीच्या दुर्घटनेमुळे खूप नुकसान झाले. घटनास्थळी बघ्यांची मोठी गर्दी झाली होती. आगीत विक्रीसाठी तयार असलेल्या सर्व इलेक्ट्रिक वाहने व कच्चा माल, बॅटऱ्या जळून खाक झाल्या आहेत.

यावेळी अग्निशमन सातपूर विभागाचे सब ऑफिसर पी. बी परदेशी, लिडींग फायरमन एस. आर पगार, फायरमन विजय ठाकूर, आर. आर खारे, शुभम लाड, यतीन आतकाडे, अग्निशमन दलाच्या फायरमन यांनी आग विझविण्यासाठी शर्थीचे प्रयत्न केले. यावेळी सातपूर पोलिस स्टेशनचे वरिष्ठ पोलिस निरीक्षक सोहन माछरे आदींसह कर्मचारी घटनास्थळी उपस्थित होते.