नाशिक शहर बससेवेची यशस्वी वाटचाल; महिनाभरातच ६५ लाखांचा महसूल

नाशिक : महापालिकेतर्फे सुरु करण्यात आलेल्या शहर बससेवेला एक महिना पुर्ण झाला असून या काळात तब्बल तीन लाख प्रवाशांनी प्रवास केला. त्यातून ६५ लाख रुपयांचा महसुल प्राप्त झाल्याचा माहिती समोर आली आहे.

महापालिकेतर्फे आठ जुलैपासून शहर बससेवा सुरु झाली. पहिल्या टप्प्यात तपोवन ते बारदान फाटा, तपोवन ते सिम्बायोसिस कॉलेज, तपोवन ते पाथर्डी गाव, सिम्बायोसिस कॉलेज ते बोरगड, तपोवन ते भगूर, नाशिक रोड ते बारदान फाटा, नाशिक रोड ते अंबड गाव, नाशिक रोड ते निमाणी, नाशिक रोड ते तपोवन या नऊ मार्गांवर मार्गांवर २७ बस सुरू करण्यात आल्या. त्यानंतर नाशिकरोड ते सिम्बॉयसिस कॉलेज, तपोवन ते अंबड, तपोवन ते पाथर्डी, तपोवन ते अंबड (कामटवाडे मार्ग) या नवीन चार मार्गांची भर पडली. मार्गिका वाढल्याने २३ बस रस्त्यावर उतरविण्याचा निर्णय घेण्यात आला.

सध्या ५२ बस कार्यान्वित

पहिल्या दिवशी तीन हजार प्रवाशी मिळाले त्यातून एक लाख ६५ हजार रुपये उत्पन्न मिळाले. बससेवेला दिवसागणिक प्रतिसाद मिळत आहे. प्रवासी संख्या वाढतं असल्याने बसची संख्या वाढविली जात आहे. शहरात सध्या ५२ बस सुरू आहेत. सिटी लिंक कंपनीच्या वतीने महिना भराचा आढावा घेतला असता तीन लाख प्रवाशी टप्पा ओलांडल्याचे स्पष्ट झाले.

प्रवाशी संख्येत सतत वाढ

कोरोनामुळे निर्बंध आहेत, त्यामुळे पुरेशा प्रमाणात बस रस्त्यावर धावत नाही. सध्या ५२ बस असून, ८ ते १८ जुलै या कालावधीत २७, तर १९ जुलैपासून २५ बस दाखल झाल्या आहेत. महिनाभरात दोन लाख ६२ हजार ३६१ किलोमीटर बस धावल्या. दोन लाख ८३ हजार २७२ प्रवाशी मिळाले. ५२६ ऑनलाइन तिकीट विक्री झाली असून, ८७ प्रवाशांनी पास काढले. अठरा जुलैपर्यंत आठ हजारांपर्यंत प्रवासी संख्या वाढली. १९ जुलै ते ६ ऑगस्ट या कालावधीत दररोजच्या प्रवासी संख्येमध्ये १४ हजार ८०० इतकी वाढ झाली.