Nashik City Transport : अवजड वाहन वाहतुकीत बदलास महिनाभराची मुदतवाढ; सुधारित अधिसूचना 3 जूनपर्यंत बदल लागू

Nashik News : अवजड वाहनांमुळे शहरात होणारी वाहतूक कोंडी, अपघातांच्या घटनांच्‍या पार्श्वभूमीवर वाहतूक शाखेतर्फे वेळोवेळी निर्बंध घातले जात असतात. त्‍यानुसार प्रायोगिक तत्त्‍वावर केलेल्‍या बदलास महिनाभराची मुदतवाढ देण्याचा निर्णय वाहतूक शाखेने घेतला आहे. त्‍यानुसार आता ३ जूनपर्यंत अवजड वाहनांच्‍या वाहतुकीसाठी बदल कायम राहणार आहे. (Nashik City Transport)

यापूर्वी प्रायोगिक तत्त्‍वावर दहा दिवसांसाठी अवजड वाहनांच्‍या वाहतूक मार्गात बदल केला होता. ही मुदत शनिवारी (ता. ४) संपत असतानाच पोलिस उपायुक्‍त चंद्रकांत खांडवी यांनी एक महिन्‍याची मुदतवाढ देण्याचा निर्णय जारी केला आहे. मुंबई-आग्रा महामार्गाने नाशिक-पुणे महामार्गाकडे जाणारे अवजड वाहने शहरातील विविध मार्गातून होत पुढे जातात.

अवजड वाहनांमुळे द्वारका चौकात होणारी वाहतूक कोंडीची समस्‍या लक्षात घेता, यापूर्वी आदेश जारी करताना रात्री ही वाहतूक फेम सिग्‍नल, श्रीश्री रविशंकर मार्गाने वडाळा, पाथर्डी गाव, पाथर्डी फाटा मार्गे मुंबईकडे वळविली होती. परंतु या मार्गात वाहतुकीची समस्‍या तसेच अपघाताच्‍या प्रमाणातही वाढ होत असल्‍याने नागरिकांकडून तक्रारी वाढत होत्‍या. (latest marathi news)

त्‍यानुसार वाहतूक शाखेने प्रायोगिक तत्त्वावर अवजड वाहनांसाठी वाहतूक मार्गात येत्‍या ४ मेपर्यंत बदल लागू केला होता. आता हा बदल पुढील महिनाभरासाठी लागू राहणार आहे.

असे आहेत बदल...

* पुण्याकडून मुंबईकडे जाणारी अवजड वाहतूक आता काठे गल्‍ली सिग्‍नल, द्वारका सर्कल येथून डावीकडे वळून रॅम्‍पने मुंबईकडे जाईल.

* मुंबईकडून पुण्याकडे जाणारी अवजड वाहतूक पाथर्डी फाटा, इंदिरानगर, वडाळा गाव, डीजीपीनगर, सम्राट सिग्‍नल मार्गे नाशिकरोडच्‍या दिशेने रवाना होईल.