Nashik Committee Election : महाविकास आघाडीतील जागा वाटपाबाबत चर्चा सुरू

Nashik Committee Election : नाशिक समिती निवडणूक चांगलीच रंगतदार होणार, असे चित्र निर्माण झाले आहे. महाविकास आघाडीतील ठाकरे गट आणि माजी सभापती देविदास पिंगळे यांच्यात मंगळवारी (ता. ११) बैठक झाली.

यात जागा वाटपाबाबत चर्चा झाली असून, काही जागांवर एकमत झाले आहे. पुढील बैठकीत ठोस निर्णय होणार असल्याची माहिती शिवसेनेचे उपनेते सुनील बागूल यांनी दिली. (Nashik Committee Election discussion about seat allocation in Mahavikas Aghadi started nashik news)

नाशिक बाजार समिती निवडणुकीत आजी-माजी खासदार नव्हे तर महाविकास आघाडी व भाजप शिवसेना शिंदे गट यांच्यात थेट लढत होणार आहे. यासाठी दोन्ही पॅनलकडून जोरदार तयारी सुरू आहे.

शिवसेना ठाकरे गट आणि माजी खासदार तथा माजी सभापती देवीदास पिंगळे यांची निवडणूक संदर्भात बैठक झाली. यात ठाकरे गटाकडून काही जागांची मागणी करण्यात आली. त्यात काही जागांवर एकमत झाले, परंतु काही जागांवर मात्र चर्चा सुरू आहे.

हेही वाचा : सामान्यांचा पैसा सुरक्षित ठेवण्यासाठीच Virtual Currency करकक्षेत

पूर्ण पॅनल कशा निवडून येईल, कोणत्या जागेवर कोणता उमेदवार द्यायचा याविषयी विचार विनिमय करण्यात आला. बैठकीस उपनेते सुनील बागूल, जिल्हाप्रमुख विजय करंजकर, माजी आमदार वसंत गिते, विनायक पांडे यांच्यासह पदाधिकारी व कार्यकर्ते उपस्थित होते.

अद्याप नाही एकही माघार

बुधवारी (ता.५) छाननीत १३७ उमेदवारी अर्ज वैध ठरले. देविदास पिंगळे यांच्या अर्जाचा निर्णय मुख्यमंत्री शिंदे यांच्या कोर्टात आहे. त्यावर अद्याप निर्णय नाही. त्यामुळे मंगळवारपर्यंत एकही अर्ज माघारी झाला नाही. २० एप्रिलपर्यंत किती उमेदवार अर्ज माघारी घेतात याकडे जिल्ह्याचे लक्ष लागले आहे.