Nashik Crime News : KYC अपडेटसाठी घेतलेल्या कागदपत्राद्वारे दुकानदारांची फसवणूक

नाशिक : दुकानदारांना हेरून त्यांना आर्थिक व्यवहारासाठी गुगल-पे मिनी स्पीकर देण्याचा बहाणा करणारा संशयित दुकानदारांकडून केवायसीसाठी कागदपत्रे घ्यायचा. याच कागदपत्रांच्या आधारे संशयिताने स्वत:साठी ऑनलाईन कर्ज घेत तीन दुकानदारांची फसवणूक केली. मलिक अमिन मोहम्मद हसन इफेदी (२१, रा. जोहरा अपार्टमेंट, अशोकनगर, सातूपर) असे अटक करण्यात आलेल्या संशयिताचे नाव आहे.

राजेश राजपाल कुसवाह (रा. हेगडेवार नगर, त्रिमूर्तीचौक, सिडको) यांच्या फिर्यादीनुसार, त्यांचे हेगडेवार चौकात अंकित प्रोव्हिजन जनरल स्टोअर नावाचे दुकान आहे. गेल्या नोव्हेंबर २०२२ मध्ये बसलेले असताना संशयित मलिक हा त्यांच्याकडे गेला. त्याने कुसवाह यांचा विश्वास संपादन करून दुकानातील ऑनलाईन व्यवहार करण्यासाठी गुगल पे मिनी स्पीकर देण्याच्या बहाण्याने त्यांच्याकडून केवायसीसाठी कागदपत्रे घेतली.

तसेच, त्यांचा फोटोही काढला. मात्र, संशयित मलिक याने दुकानदार कुसवाह यांना मिनीस्पीकर न देता उलट त्या कागदपत्रांच्या आधारे त्याने स्वत:साठी होम क्रेडिट फायनान्सच्या माध्यमातून ऑनलाईन ४४ हजार रुपयांचे कर्ज घेतले. याचप्रकारे त्याने सिडकोतील आणखी दोन दुकानदारांनाही मिनीस्पीकर देण्याच्या बहाण्याने केवायसीसाठी घेतलेल्या कागदपत्रांच्या आधारे ऑनलाईन प्रत्येकी १०-१० हजार रुपयांचे कर्ज घेतले.

याप्रकरणात आपली फसवणूक झाल्याचे लक्षात येताच दुकानदार कुसवाह यांनी अंबड पोलिसात संशयिताविरोधात फिर्याद दिली. त्यानुसार गुन्हा दाखल करण्यात आला आहे. संशयित मलिक याने गेल्या नोव्हेंबर ते ९ जानेवारी या दरम्यान अनेकांचा गंडा घातला आहे. संशयित मलिक यास अंबड पोलिसांनी सोमवारी (ता. ९) रात्री साडेअकरा वाजता अटक केली असून, त्यास न्यायालयाने दोन दिवसांची पोलीस कोठडी सुनावली आहे.