Nashik Crime News : होळकर पुलालगत फिरस्त्याचा खून; पंचवटी पोलिसांकडून संशयितासह 1 अल्पवयीन ताब्यात

Nashik Crime News : मालेगाव स्टँड समोरील डाव्या बाजूने होळकर पुलाच्या पायरीजवळ शौचालयालगत एका ४० ते ४५ वर्षीय फिरस्त्याचा दगडाने ठेचून निर्घृण खूनाची घटना समोर आली आहे. पंचवटी पोलिसांनी तपासाची चक्रे फिरवत चार तासांतच संशयित सचिन रमेश वनकर (वय १९, रा. गोदाघाट, पंचवटी) सह एका विधीसंघर्षित बालकास ताब्यात घेतले आहे. तर मृताची ओळख पटू शकलेली नाही. (Nashik Crime One killed near Holkar Bridge police detained 1 minor along with suspect)

शनिवारी (ता.९) मध्यरात्री अडीच वाजेच्या सुमारास संशयित सचिन वनकर व त्याचा अल्पवयीन साथीदार दारूच्या नशेत असताना त्यांनी होळकर पुलालगतच्या पायरीजवळ शौचास बसलेल्या फिरस्त्याला हटकत त्याच्या दिशेने दगड फेकले. यामुळे फिरस्त्यानेही दगड फेकत प्रत्युत्तर दिले.

याचे पर्यवसान हाणामारीत होऊन संशयितांनी फिरस्त्याच्या डोक्यात दगड मारुन खून केला. दोन्ही संशयितांवर आधीच चोरीचा गुन्हा दाखल आहे.(latest marathi news)

दरम्यान, रविवारी (ता.१०) सकाळच्या सुमारास याठिकाणी अज्ञात व्यक्ती रक्ताच्या थारोळ्यात पडलेला असल्याबाबत काही नागरिकांच्या निदर्शनास आले. त्यांनी जवळच असलेल्या मालेगाव स्टॅंड पोलिस चौकीत धाव घेत पोलिसांना माहिती कळविली.

पोलिसांनी पंचनामा करून मृतदेह उत्तरीय तपासणीसाठी जिल्हा शासकीय रुग्णालयात पाठवला. या परिसरातील सीसीटीव्ही फुटेजची पोलिसांनी तपासणी करीत संशयितांचा शोध घेत पेठरोडवरील अश्वमेध नगरमधून अटक केली.