Nashik News : पुन्हा एकदा ‘टोलचा झोल’ उघड! वाहन घरीच, तरी मोबाईलवर टोलपावती; त्र्यंबकेश्वरच्या ग्राहकाची फसवणूक

नाशिक : चारचाकी गाडी घरीच उभी केलेली असताना मुंबई-आग्रा महामार्गावरील पडघा टोलनाक्याच्या नावाने टोलपावती निघाल्याचा मेसेज मोबाईलवर प्राप्त झाला. बुधवारी (ता. २८) सकाळी सातला हा प्रकार घडला. गाडी घरासमोरच असताना परस्पर टोल फाडल्याने ‘टोलचा झोल’ पुन्हा एकदा उघडकीस आला आहे. (Nashik toll receipt Problem marathi news)

त्र्यंबकेश्वर येथील बाबूराव उगले यांची चारचाकी (एमएच १५ जेएम ६३१८) घरासमोरच उभी असताना बुधवारी (ता. २८) सकाळी सातला मुंबई-आग्रा महामार्गावरील अर्जुनअली (पडघा) टोलनाक्यावर १४० रुपये कापल्याचा मेसेज त्यांना मोबाईलवर प्राप्त झाला.

या मेसेजच्या पडताळणीसाठी श्री. उगले यांनी राष्ट्रीय महामार्ग प्राधिकरणाच्या अधिकाऱ्यांशी संवाद साधला असता त्यांना १०३३ या टोल फ्री क्रमांकावर तक्रार नोंदविण्यास सांगण्यात आले. या क्रमांकावर संपर्क केला असता त्यांनी तक्रार नोंदवूनच घेतली नाही. (Latest Marathi News)

बँकेशी संपर्क साधण्याचे आवाहन केले. बँकेशी संपर्क केला, तर कुणीच फोन उचलत नसल्याचा अनुभव त्यांना आला. त्यामुळे त्यांनी थेट केंद्रीय वाहतूकमंत्री नितीन गडकरी यांच्या कार्यालयाशी संपर्क साधला असता त्यांना हीच प्रक्रिया सांगण्यात आली. पण ग्राहकाचा प्रश्न काही सुटला नाही. या प्रकरणावरून टोलचा झोल पुन्हा एकदा उघडकीस आला आहे.

"टोल नाक्यावर न जाताच १४० रुपये बँक खात्यातून कपात झाल्याचा मेसेज प्राप्त झाला. याची तक्रार व खातरजमा करण्यासाठी अनेक ठिकाणी दूरध्वनी केला. पण पदरी निराशा पडली. हा फक्त १४० रुपयांचा विषय नसून, अशा पद्धतीने ग्राहकांची फसवणूक होणे योग्य नाही."

- बाबूराव उगले, तक्रारदार