HSC Exam 2024 : मराठीच्‍या पेपरला घोटीत आढळले 2 कॉपीबहाद्दर

HSC Exam 2024 : इयत्ता बारावीच्‍या परीक्षेत शुक्रवारी (ता. २३) सकाळ सत्रात झालेला मराठी हा भाषा विषयाचा पेपर बहुतांश विद्यार्थ्यांना सोपा गेला. दरम्‍यान, जिल्ह्यातील घोटी येथील परीक्षा केंद्रावर कॉपी करताना आढळल्‍याने दोन विद्यार्थ्यांवर कारवाई करण्यात आली. नाशिक विभागात इतर कुठेही गैरप्रकार आढळला नसल्‍याचे शिक्षण मंडळातर्फे सांगण्यात आले. (nashik HSC Exam 2024 marathi news)

फेब्रुवारी-मार्च २०२४ सत्रातील बारावीच्‍या लेखी परीक्षेला उत्‍साहात सुरवात झाली. पहिल्‍या टप्प्यात भाषा विषयांचे पेपर पार पडत आहेत. इंग्रजी, हिंदीनंतर शुक्रवारी सकाळच्‍या सत्रात मराठी व इतर प्रादेशिक भाषा विषयांची परीक्षा घेण्यात आली. दुपारच्‍या सत्रात ऊर्दू आणि फ्रेंच, स्‍पॅनिश, पाली या भाषांची परीक्षा नियोजित होती. नाशिक विभागातून सुमारे एक लाख १६ हजार विद्यार्थी परीक्षेसाठी प्रविष्ट झालेले होते.

मराठीच्‍या पेपरला घोटी येथील केंद्रावर दोन कॉपीबहाद्दर आढळून आले. उर्वरित कुठेही गैरप्रकार आढळला नाही. दरम्‍यान, शिक्षण विभागातर्फे विविध पथकांच्‍या माध्यमातून केंद्रांना भेटी दिल्‍या जात आहेत. परीक्षेच्‍या या पुढील टप्प्‍यात शाखानिहाय विशेष विषयांचे पेपर पार पडणार असून, विद्यार्थ्यांकडून उजळणीवर भर दिला जातो आहे. (latest marathi news)