Nashik News : नाशिकच्या विद्यार्थ्याने नवी दिल्लीत उचलले टोकाचे पाऊल

Nashik News : नवी दिल्ली आयआयटी महाविद्यालयात एमटेक शिक्षण घेत असलेल्या वरद संजय नेरकर (वय २४, रा. मैत्रप्रेरणा अपार्टमेंट, सिद्धिविनायक परिसर, हनुमानवाडी) या विद्यार्थ्याने गुरवारी (ता. १५) दिल्लीतील वसतिगृहात गळफास घेऊन आत्महत्या केल्याची घटना उघडकीस आली. जळगाव उत्तर महाराष्ट्र विद्यापीठात बीटेक केल्यानंतर वरद याची एमटेकच्या शिक्षणासाठी निवड झाली होती. (students took an extreme step)

२०२२ पासून तो दिल्लीच्या आयआयटी महाविद्यालयात शिक्षण घेत होता. त्याचा हा कोर्स पूर्ण होण्यासाठी केवळ दोन महिन्यांचा कालावधी शिल्लक राहिला होता. त्याच वेळी त्याच्या आत्महत्येचे वृत्त आल्याने परिसरात सर्वांना धक्का बसला आहे. त्याच्या आत्महत्येची माहिती महाविद्यालयाकडून कळताच त्याचे आई-वडील दिल्लीला रवाना झाले.

वरद याचा मृतदेह रात्री विमानाने मुंबईला आणण्यात येणार असून, सकाळी दहापर्यंत ते पंचवटीत पोचण्याची शक्यता असल्याचे त्याच्या नातेवाइकांनी सांगितले. आई गृहिणी असून, वडील महापालिकेत बांधकाम विभागात सेवेत आहे. त्याच्या पश्चात आई, वडील, एक लहान भाऊ असा परिवार आहे.