Nashik Summer Heat : सूर्यनारायण कोपले; 42 अंश तापमानाची नोंद

Nashik News : बुधवारी (ता. २२) शहरात कमाल ४२ अंश सेल्सिअस तर किमान २६.८ अंश सेल्सिअस तापमानाची नोंद झाली आहे. दुपारच्या सुमारास सूर्य आग ओकत असताना, दुसरीकडे ढगाळ वातावरणामुळे दमटपणा वाढला होता. यामुळे वातावरणात उष्मा कायम असल्याने उकाड्यात वाढ झाली होती. पुढील आठवडाभर उष्णतेत वाढ होईल, अशी माहिती हवामान अभ्यासकांनी दिली आहे.

बुधवारी नागरिक दिवसभर उष्णता जाणवत असताना सायंकाळीही घामाच्या धारा पुसत होते. दुपारी शहरातील रस्त्यांवर देखील उष्णतेचा परिणाम दिसून आला. सकाळी अकरानंतर सायंकाळपर्यंत शहरातील रस्त्यांवर अघोषित संचारबंदीचे चित्र पाहायला मिळाले. हे तापमान यंदाचे सर्वाधिक तापमान असल्याचा अंदाज वर्तवला जात आहे.

यातही अजून उष्मा वाढल्याची शक्यता वर्तवली गेली असल्याने नाशिककरांना अजून काही दिवस या उष्णतेशी झुंजावे लागणार आहे. (latest marathi news)

बुधवारी दिवसभर नागरिक उकाड्यामुळे हैराण झाले असताना रात्रीदेखील त्यांना उकाड्याचा सामना करावा लागला. तीव्र उकाड्यामुळे एसी, कुलर, पंख्यांचा वापर वाढला आहे. यामुळे विजेची मागणीदेखील वाढली आहे.

अशात रात्री वीजपुरवठा खंडित झाल्यास आधीच उकाड्याने हैराण झालेल्या नाशिककरांना त्यांच्या झोपेलादेखील रामराम घालावा लागत आहे.