Nashik Unseasonal Rain Damage: गारपीटीने 10 हजार 600 हेक्टरवरील पिकांचे नुकसान! निफाड तालुक्यात 22 हजार शेतकरी‌ बाधित

निफाड : गारपीट व अवकाळी पावसामुळे निफाड तालुक्यातील दहा हजार सहाशे हेक्टरवरील द्राक्ष, कांदा, ऊस, गहू व मका या पिकांना मोठा फटका बसला आहे. तालुक्यातील २२ हजार शेतकरी गारपीटीने बाधित झाले आहेत.

विधा‌नसभेच्या सुरू असलेल्या हिवाळी अधिवेशनात मुख्यमंत्री गारपीटग्रस्तांच्या मदतीबाबत काय निर्णय घेतात, याकडे नुकसानग्रस्त शेतकऱ्यांचे लक्ष लागले आहे. (Nashik Unseasonal Rain Damage Damage to crops on 10 thousand 600 hectares due to hail 22 thousand farmers affected in Niphad taluka)

तालुक्यातील कसबे सुकेणे, पिंप्री रौळस, कोठुरे, रसलपूर, निफाड, सोनेवाडी, कुंदेवाडी, शिवडी, विंचूर, लासलगाव, नांदुर्डी, खेडे, उगाव, पानेवाडी, पिंपळस, गोंडेगाव फाटा, चांदोरी यासह सुमारे पन्नासवर गावांत गारपीटीने शेतातील‌ द्राक्ष, कांदा, गहू, हरभरा, मका व टोमॅटो या पिकांची नासाडी झाली.

द्राक्ष, कांदा पिकांचे मोठे नुकसान झाले. पालकमंत्री दादा भुसे, मदत व पुनर्वसन मंत्री अनिल पाटील यांनी गारपीटीने झालेल्या नुकसानीची पाहणी केली. त्यानंतर महसूल व कृषी विभागाने संयुक्तपणे पंचनामे केले.

निफाड तालुक्यात झालेल्या नुकसानीचा अहवाल शासनला सादर झाला आहे. त्या अहवालानुसार तालुक्यातील १० हजार ६०० हेक्टरवरील द्राक्ष, कांदा, ऊस, मका, टोमॅटो, गहू हरभरा या प्रमुख पिकांचे आतोनात नुकसान झाले आहे.

तालुक्यातील २२ हजारांवर शेतकरी बाधित झाले आहेत. पंचनामे झाल्याने आता गारपीटग्रस्त शेतकऱ्यांचे लक्ष विधानसभेचे सुरू असलेल्या हिवाळी अधिवेश‌नाकडे लागले आहे. अधिवेशनात गारपीटग्रस्त शेतकऱ्यांच्या मदतीबाबत निर्णय घेणार असल्याचे राज्यकर्त्यांनी सांगितले आहे.

"निफाड तालुक्यात गारपिटीने झालेल्या नुकसानीचे पंचनामे महसूल व कृषी विभागाने संयुक्तपणे पूर्ण केले आहेत. त्यानुसार निफाड तालुक्यातील दहा हजार ६०० हेक्टरवरील द्राक्ष, कांदा, ऊस, गहू, टोमॅटो, हरभरा यासह इतरही पिकांचे नुकसान झाले आहे. २२ हजार शेतकरी‌ बाधित झाले आहेत. त्याचा सविस्तर अहवाल जिल्हाधिकारी कार्यालयात पाठविला‌ आहे."

-शरद घोरपडे, तहसीलदार, निफाड

"गारपीटीने झालेल्या नुकसा‌नीची मोठी झळ द्राक्ष बागायतदारां‌ना बसली आहे. लहान मुलाप्रमाणे वर्षभर बागेचे संगोपन केले. मात्र, द्राक्षाचे पीक हातातोंडाशी येण्याचा काळ अन्‌ गारांचा मारा. यामुळे द्राक्ष शेतीत करिअर करू पाहणाऱ्या तरुणांमध्ये मोठे नैराश्य आले आहे. डोक्यावर लाखोंचे कर्ज अन्‌ डोळ्यासमोर गारपीटीने निष्पर्ण झालेल्या द्राक्षबागा हे विदारक चित्र हजारो शेतकऱ्यांनी अनुभवले आहे. यातून पुन्हा उभे राहण्यासाठी भरीव मदतीसह गारपीटग्रस्तांची कर्जमाफी करणे गरजेचे आहे."

-ॲड. रामनाथ शिंदे, संचालक, महाराष्ट्र राज्य द्राक्ष बागयतदार संघ पुणे, विभाग नाशिक