Nashik News: ZP मुख्यालयात पाणी मिळणार का? पाणी पिण्यासाठी 6 वॉटर फिल्टर 15 दिवसांपासून पडून

Nashik News : जिल्हा परिषदेतील मुख्यालयात कामासाठी येणाऱ्यांना पिण्याच्या पाण्यासाठी वणवण फिरावे लागत असल्याचे वास्तव ‘सकाळ’ ने २२ मेस प्रसिद्ध केले होते. त्यावर, प्रशासनाने तातडीने मुख्यालयात येणाऱ्या सामान्यांसाठी पिण्याचे पाणी मिळावे यासाठी वॉटर फिल्टर बसविण्याचा निर्णय घेतला.

त्यानुसार, सहा वॉटर फिल्टर खरेदी केले गेले. परंतु, महिनाभरापासून हे वॉटर फिल्टर मुख्यालयातील विविध ठिकाणी पडून आहेत. उन्हाळा संपत आला असून पावसाची चाहूल लागली. मात्र नेमके पिण्याचे पाणी कधी मिळणार असा प्रश्न आता उपस्थित होत आहे. (Nashik ZP headquarters 6 water filters for drinking water dumped for 15 days news)

जिल्ह्याच्या विकासाचे मुख्य केंद्र असलेल्या जिल्हा परिषदेत जिल्ह्यातील पिण्याचे पाण्याचे नियोजन होत असते. परंतु जिल्हा परिषदेतील मुख्यालयातच पिण्याच्या पाण्याची व्यवस्था नसल्याने ग्रामीण भागाकडून आलेल्या नागरिकांचे तसेच ठेकेदार, अभ्यागत यांचे हाल होत आहेत.

जिल्हा परिषदेत अधिकारी-कर्मचारी वगळता दररोज येणाऱ्यांची संख्या मोठी आहे. मात्र, जिल्हा परिषदेच्या आवारात कुठेही पिण्याच्या पाण्याची व्यवस्था नसल्याने पिण्याच्या पाण्यासाठी सामान्यांचे हाल होतात.

हे वास्तव निर्दशनास आणून दिल्यानंतर प्रशासनाने लागलीच मुख्यालयात पिण्याचे पाण्याची व्यवस्था करण्याचे निर्देश यंत्रणेला दिले. त्यानुसार बांधकाम विभागाकडून देखभाल दुरुस्ती अंतर्गत सहा वॉटर फिल्टर खरेदी केले.

हेही वाचा : Credit Card फसवणूक....काय घ्याल काळजी?

प्रत्येकी ३४ हजारांचे असलेले हे वॉटर फिल्टर आरोग्य, कृषी, रावसाहेब थोरात सभागृहाबाहेर, लेखा व वित्त विभाग, बांधकाम विभाग तसेच, शिक्षण या सहा विभागाबाहेरील परिसरात बसविले जाणार आहे. सदर वॉटर फिल्टर खरेदी होऊन १५ दिवसांचा कालावधी उलटला. मात्र, अद्याप हे वॉटर फिल्टर बसविण्यात आलेले नाही.

"मुख्यालयातील सहा ठिकाणी हे वॉटर फिल्टर बसविले जाणार आहे. वॉटर फिल्टरसाठी लाइन टाकण्याचे काम सुरू आहे. येत्या दोन ते तीन दिवसांत हे वॉटर फिल्टर बसविले जातील. लवकरच अभ्यागताना पिण्याचे पाणी मिळेल."

- संदीप सोनवणे, कार्यकारी अभियंता, जि. प. बांधकाम विभाग