Nashik News : नववर्षाची सुरवात गारठ्याने!

नाशिक : २०२२ मध्ये हिवाळ्यात कधी वातावरणात गारठा निर्माण होत असतानाच, मध्येच थंडी गायब झाल्‍याची अनुभूती येत होती. परंतु नवीन वर्षाची सुरवातच गारठ्याने झाली आहे. पहिल्‍याच दिवशी रविवारी (ता. १) नाशिकचे किमान तापमान १० अंश सेल्‍सीयस नोंदविले गेले. तर, कमाल तापमान ३०.७ अंश राहिले. (New Year begins with cold winter weather nashik news)

हेही वाचा : जोखमीचे भान राखूनच करा SIP मध्ये गुंतवणूक

उत्तर भारतात झालेल्‍या बर्फवृष्टीमुळे येत्‍या काही दिवसांत पारा आणखी घसरण्याची शक्‍यता वर्तविली जात आहे. यापूर्वी नोव्‍हेंबरचे काही दिवस व त्‍यानंतर डिसेंबरमध्येही काही दिवस वातावरणात गारठा जाणवत होता. नाताळच्‍या दिवशी २५ डिसेंबरला नाशिकचे किमान तापमान ९.८ अंश सेल्‍सीयसपर्यंत घसरले होते.

त्‍यानंतर मात्र तापमानात वाढ झाल्‍याने किमान तापमान सरासरी ११ ते १२ अंश सेल्सियस राहिले. नवीन वर्षाच्‍या पहिल्‍या दिवशी मात्र तापमान घसरून १० अंश सेल्‍सीयसवर आले. येत्‍या आठवड्याभरात तापमानात आणखी घसरण होण्याची शक्‍यता आहे.

त्‍यामूळे आता पुन्‍हा शेकोट्या पेटणार असून, नाशिककरांना बचावासाठी स्‍वेटर, टोपी, शॉलचा आधार घ्यावा लागणार आहे. सध्या कमाल तापमानात घसरण होत असली, तरी दिवसा उन्‍हाचे वातावरण राहात असल्‍याने कमाल तापमान सरासरी ३० अंश सेल्‍सीयसपर्यंत राहाते आहे. त्‍यामूळे मिश्र वातावरणाचा अनुभव नाशिककर सध्या घेत आहेत.