Nashik : महापालिकेचे स्वतःच्याच धोकादायक इमारतीकडे दुर्लक्ष | Sakal
sakal

बोलून बातमी शोधा

NMC Building

Nashik : महापालिकेचे स्वतःच्याच धोकादायक इमारतीकडे दुर्लक्ष

जुने नाशिक : पूर्व विभागीय कार्यालय (East Divisional Office) ब्रिटिशकालीन इमारतीच्या मुख्य प्रवेशद्वारावरील दगड खचला आहे. शिवाय पिलर देखील धोकादायक झाला आहे. कर्मचाऱ्यांसह परिसरातील व्यावसायिकांकडून भीती व्यक्त केली जात आहे. इतरांच्या धोकादायक इमारतींना नोटीस बजावणाऱ्या महापालिकेचे (NMC) स्वतःच्याच धोकादायक इमारतीकडे दुर्लक्ष होत असल्याने अशी परिस्थिती उद्भवल्याच्या प्रतिक्रिया नागरिकांकडून देण्यात आल्या. (NMC neglects its own dangerous East Divisional Office building Nashik News)

मेनरोड येथे ब्रिटिशकालीन इमारतीत पूर्व विभागीय कार्यालय आहे. गेल्या अनेक वर्षांपासून या इमारतीच्या देखभाल, दुरुस्तीकडे महापालिकेचे दुर्लक्ष झाले आहे. इमारतीचा विविध भाग धोकादायक झाला आहे. तीन ते चार वर्षांपूर्वी इमारतीच्या मागील भागातील भिंतीचा एक दगड कोसळला होता. शिवाय आत आवारात उभे असलेल्या विभागीय अधिकाऱ्यांच्या वाहनावरदेखील इमारतीचा काही भाग कोसळून नुकसान झाले होते. त्यानंतर इमारतीच्या दुरुस्तीसाठी निधी मंजूर करण्यात आला, असे नाव छापण्याच्या अटीवर अधिकाऱ्यांकडून सांगण्यात आले. प्रत्यक्षात मात्र अद्यापही कुठल्या प्रकारची दुरुस्ती झालेली नाही.

ब्रिटिशकालीन ठेवा असलेल्या इमारतीची दुरुस्ती करण्याची मागणी होत आहे. असे असताना याच इमारतीच्या मुख्य प्रवेशद्वारावरील मोठा दगड खचला आहे. थोड्याफार आधारावर तो अडकून आहे. शिवाय दगडास लागून असलेला पिलरनेदेखील भिंत सोडली आहे. पिलर आणि भिंत दोघांमध्ये मोठी पोकळी निर्माण झाली आहे. त्यामुळे पिलर आणि दगड दोन्ही धोकादायक झाले आहे. मुसळधार पाऊस आल्यास पिलर आणि दगड कोसळून मोठी दुर्घटना होण्याची शक्यता आहे. कार्यालयातील अधिकाऱ्यांच्या लक्षात आल्याने त्यांनी पश्चिम विभागास याबाबतची माहिती दिली. पश्चिम विभाग बांधकाम विभागाचे अधिकारी- कर्मचाऱ्यांनी घटनास्थळी भेट देत पाहणी केली. दरम्यान, खालच्या ठिकाणी बॅरेकेट उभे केले.

हेही वाचा: स्मार्ट रोडवर थाटलेत अनधिकृत रिक्षाथांबे

परंतु, केवळ त्यातून समस्या सुटणार नाही. धोकादायक भागाची दुरुस्ती होणे आवश्यक आहे. मुख्य प्रवेशद्वार असल्याने विविध कामानिमित्त नागरिकांचे येणे- जाणे आहे. शिवाय परिसरात विविध व्यावसायिकदेखील व्यवसाय करतात. अचानक पिलर किंवा दगड कोसळला, तर दुर्घटना होण्याची शक्यता आहे. त्वरित धोकादायक भागाची दुरुस्ती करण्यात यावी, अशी मागणी कर्मचाऱ्यांसह नागरिक, परिसरातील व्यावसायिकांकडून करण्यात येत आहे.

हेही वाचा: स्थानिक नेत्यांच्या भूमिकेवर शिवसेनेचे भवितव्य

Web Title: Nmc Neglects Its Own Dangerous East Divisional Office Building Nashik News

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..