ओझर विमानतळाला ‘हज टर्मिनल’चा दर्जा

जुने नाशिक : ओझर विमानतळाला हज टर्मिनलचा दर्जा देण्यात आला आहे. केंद्र सरकारकडून नुकत्याच प्रसिद्ध करण्यात आलेल्या हज टर्मिनलच्या यादीत ओझर विमानतळाचेही नाव असल्याचे खासदार हेमंत गोडसे यांनी सांगितले.

या यादीत ओझरचा समावेश व्हावा यासाठी खासदार गोडसे यांचा काही महिन्यांपासून केंद्र व राज्य सरकारकडे पाठपुरावा सुरू होता. त्यात त्यांना यश आले. या दर्जासाठी राज्य सरकारची शिफारस आवश्यक असते. त्यामुळे खासदार गोडसे यांनी राज्याच्या अल्पसंख्याक मंत्रालयाकडून केंद्राकडे शिफारस पाठविली होती. ओझरहून हजसाठी उड्डाण सुरू करण्यासाठी आवश्‍यक त्या सर्व सोयी-सुविधा उपलब्ध असल्याचा अहवाल येथील एचएएल प्रशासनाने केंद्राच्या नागरी उड्डाण मंत्रालयास शनिवारी (ता. ३०) पाठविला. त्यामुळे आता लवकरच येथून हजसाठी विमानसेवा सुरू होणार असल्याचे सांगण्यात आले.

दरम्यान, उत्तर महाराष्ट्रातून दर वर्षी १२ ते १५ हजार मुस्लिम बांधव हज यात्रेसाठी जात असतात. यासाठीची प्रक्रिया राज्य शासनाने जरी ऑनलाइन केली असली, तरी कागदपत्रांची पूर्तता करण्यासाठी भाविकांना मुंबई येथे तीन ते चार वेळा जावे लागते. त्यानंतर मुंबई विमानतळावरून हज यात्रेसाठी रवाना व्हावे लागते. यात पैसे आणि वेळ खर्ची पडतो.

कोट्यानुसार उड्डाण

कोरोनामुळे सौदी सरकारकडून यंदा हज यात्रेचा कोटा कमी करण्यात आला आहे. कोटा वाढल्यास या वर्षापासून, अन्यथा पुढील वर्षापासून ओझर विमानतळावरुन हज यात्रेसाठी विमानव्यवस्था उपलब्ध होणार असल्याचेही श्री. गोडसे यांनी सांगितले.