Raj Thackeray | मनसे महिला पदाधिकाऱ्यांना न्यायालयाकडून दिलासा

नाशिक : मशिदीसमोर हनुमान चालिसा लावण्याचा प्रयत्न केल्याप्रकरणी पंधरा दिवसांसाठी शहरातून हद्दपार करण्यात आलेल्या मनसेच्या सात महिला पदाधिकारी व कार्यकर्त्यांना न्यायालयाने दिलासा देत त्यांच्या हद्दीपारीला २५ मेपर्यंत स्थगिती दिली आहे.

४ मेस पहाटेच्या सुमारास भद्रकाली पोलिस ठाण्याच्या हद्दीत मनसे महिला पदाधिकारी सुजाता डेरे, कामिनी दोंदे, अक्षरा घोडके, अरुणा पाटील, निर्मला पवार आणि स्वागता उपासनी यांना पोलिसांनी मशिदीसमोर हनुमान चालिसा वाजविण्याचा प्रयत्न केल्याच्या कारणातून ताब्यात घेतले होते. ताब्यात घेतल्यानंतर या सर्वांना मुख्य न्यायदंडाधिकारी यांच्यासमोर हजर केले असता, या सर्व महिला पदाधिकारी व कार्यकर्त्यांना १५ दिवसांसाठी शहरातून हद्दपार केले होते. मुख्य न्यायदंडाधिकारी यांनी केलेल्या कारवाईविरुद्ध जिल्हा व सत्र न्यायालयात याचिका दाखल करण्यात आली होती. या याचिकेवर बुधवारी (ता. ११) अतिरिक्त सत्र न्यायाधीश व्ही. पी. देसाई यांच्या न्यायालयात सुनावणी झाली असता, त्यांनी हद्दपारीच्या आदेशाला २५ मेपर्यंत स्थगिती दिली आहे.