Rajya Natya Spardha: स्वतःचा शोध घेणारा 'आपुलाची वाद आपणासी'

देवाचा शोध घ्यायचा असेल तर आधी स्वतःचा शोध घेतला पाहिजे हा भावार्थ सांगणारी नाट्यकृती 'आपुलाची वाद आपणासी'.

६२ व्या महाराष्ट्र राज्य हौशी मराठी राज्य नाट्य स्पर्धेत रविवारी (ता. १०) मायको एम्प्लॉईज फोरम या संस्थेतर्फे सादर झाले. समीर मोने लिखित या नाटकाचे सचिन रहाणे यांनी दिग्दर्शन केले. (Rajya Natya Spardha Self Discovery Apulachi Vada Paasani nashik)

वारकरी संप्रदाय ज्यांना जगद्गुरु मानतो त्या संत तुकारामांच्या प्रापंचिक जीवनातील क्षणांचा परिचय या नाट्यकृतीतून प्रेक्षकांसमोर उभा राहिला.

चिरंतनाचा शाश्वत शोध घेण्यासाठी संत तुकाराम घरातून बाहेर निघून जात आणि दुसरीकडे कुटुंबात त्यांच्या अनुपस्थितीमुळे उद्भवणारे कलह प्रसंगानुरुप उभे राहिले. आई- वडील सोडून गेले. भाऊ विरक्तीने तिर्थाटनाला जातो.

विठ्ठलाच्या भेटीला विकुंठ प्राप्तीसाठी तुकाराम घरातून निघून जातात अन् त्यांना शोधण्याचा प्रयत्न भाऊ कान्होबा करत असतो.

तेव्हा विठ्ठल कान्होबाला दर्शन देऊन सांगतात वैकुंठाच्या वाटेने निघालेल्या तुकारामाला शोधायचे असेल तर तुला आधी विठ्ठलाला शोधावे लागेल अन् विठ्ठलाला शोधायचे असेल तर आधी स्वतःचा शोध घ्यावा लागेल.

मानवी आयुष्यात मरण टाळण्यासाठी देव शोधू लागतात, अनेक मार्ग अवलंबतात मात्र भय आत्मसात करतात. तरीही मरणाला कवटाळले जाते हे कोणालाच चुकत नाही. जीवनातील हाच संघर्ष अर्थात 'आपुलाची वाद आपणासी' या नाट्यकृतीतून चिंतन करायला लावतो.

विषयाच्या मांडणीसाठी दिग्दर्शकाची मेहनत कलावंत आपल्या अभिनयातून फळाला नेत होते. नेपथ्य पुरक होते. प्रकाशयोजना व पार्श्वसंगीत काही तांत्रिक आणि क्षणिक बाबी सोडल्यास प्रसंगी उत्तम साकारले.

प्रणील तिवडे, सोनल उमा सुरेश, जय शुक्ल, केतकी कुलकर्णी, विजय घुमरे. श्रुतिका घुले- गाडे, सम्राट सैंदानकर, शब्दजा वेलदोडे- देशपांडे, स्वरुप बागूल, नीलेश सोनार, स्वप्नील वानखेडे, सनी धात्रक, दिगेन वाघ, सुरज बोरसे, राधा चव्हाण या कलावंतांनी नाटकात भूमिका साकारल्या.

नेपथ्य दीपक चव्हाण, विनय कटारे यांनी साकारले. विनोद राठोड यांनी प्रकाशयोजना तर सचिन रहाणे यांनी पार्श्वसंगीत दिले. ललित कुलकर्णी यांनी रंगभूषा तर मोहिनी सरोदे, भावना कुलकर्णी यांनी पात्रांच्या वेशभूषा साकारल्या.