मालेगावच्या बाजारात कैरी दाखल; रमजानमुळे भाजीपाल्याच्या मागणीत घट

मालेगाव (जि. नाशिक) : येथील भाजीपाला बाजारात लवंगी मिरची, जाड मिरची, कोथिंबीर, लिंबू यांचे भाव वाढले आहेत. आवक घटल्यामुळे बाजारात लिंबू भाव खात आहे. शहरात रमजानपर्वामुळे (Ramzan Festival) भाजीपाल्याची मागणी काही प्रमाणात घटली आहे. येथील बाजारात कैरीचे आगमन झाले आहे. ३० ते ४० रुपये किलोने कैरी विकली जात आहे.

येथील बाजारात आठवड्यापासून कैरी विक्रीसाठी येत असून, किरकोळ विक्रेत्यांकडे ३० ते ४० रुपये किलोने मिळत आहे. सध्या आंध्र प्रदेशमधून येथे कैरी विक्रीसाठी येत आहे. रोज पाच ते दहा टन कैरीची आवक होत आहे. जानेवारी महिन्यात कैरीला विक्रमी भाव होता. कैरीने जानेवारीत शंभरी ओलांडली होती. गुजरात व कसमादे परिसरातील कैरी येथील बाजारात जूनच्या सुरवातीला विक्रीसाठी दाखल होईल. मृगाच्या पावसानंतर लोणचे घालण्याची प्रथा आहे. यानंतरच कैरीचा बाजार तेजीत येईल. जूनपासून मालेगावी रोज ५० ते ६० टन कैरीची विक्री होणे अपेक्षित असल्याचे कैरीचे घाऊक व्यापारी महेंद्र (बाबा) वाघ यांनी सांगितले.

रमजान महिन्यात मुस्लिम बांधवांचे उपवास सुरू असल्याने बाजारात फळांना मागणी वाढली आहे. भाजीपाल्याच्या मागणीत मोठ्या प्रमाणात घट झाली. महिन्यापासून भाजीपाल्याचे भाव कोलमडले आहेत. भाव घसरल्याने हातगाडीवरील भाजीपाला विक्रेते अन्य व्यवसायाकडे वळले आहेत. पूर्व भागातील बहुसंख्य भाजीपाला विक्रेते नान, कपडे, सुत्तरफेणी, चप्पल विक्रीचा व्यवसाय करीत आहेत. येथे हातगाडीवर भाजीपाला विक्री करणाऱ्यांच्या संख्येतही घट झाली आहे.