Legislative Council Elections : नाशिक विभागीय आयुक्तांकडून विधान परिषद निवडणुकीचा आढावा

नाशिक : येत्या ३० जानेवारीला होणाऱ्या नाशिक पदवीधर मतदारसंघ निवडणुकीच्या तयारीचा आज (ता.९) विभागीय आयुक्त राधाकृष्ण गमे यांनी पूर्व तयारी आढावा घेतला. (Review of Legislative Council Elections by Nashik Divisional Commissioner nashik news)

विभागीय आयुक्त कार्यालयात झालेल्या बैठकीला जिल्हाधिकारी गंगाधरन डी. (नाशिक), जलज शर्मा (धुळे), महसूल उपायुक्त संजय काटकर, रमेश काळे, उन्मेष महाजन, प्रज्ञा बडे- मिसाळ आदी उपस्थित होते.

दूरदृश्य प्रणालीद्वारे नगर जिल्हाधिकारी डॉ. राजेंद्र भोसले, नंदूरबार जिल्हाधिकारी मनीषा खत्री, उपजिल्हाधिकारी अरविंद अंतुर्लीकर, तुकाराम हुलावळे उपस्थित होते.

श्री गमे यांनी यावेळी मतपेट्यांची उपलब्धता, मतपत्रिका छपाई याचा आढावा घेतला. तसेच निवडणूक काळातील वाहनाबाबतचे नियोजन, सूक्ष्म निरीक्षक नियुक्त्या, तसेच निवडणूक प्रक्रिया शांततेत व सुरळीत पार पडण्यासाठी सुरक्षा व्यवस्थेबाबत नियोजन, या बाबतचा आढावा त्यांनी घेतला.

निवडणूक काळात सर्व अधिकाऱ्यांनी समन्वयाने काम करून निवडणूक प्रक्रिया यशस्वी करावी, असे आवाहन त्यांनी केले.