esakal | फुफ्फुसाच्या आरोग्यासाठी घरातल्या घरात फक्त सहा मिनिटे चाला! वैद्यकिय अधिकारी सांगतात..

बोलून बातमी शोधा

lungs
फुफ्फुसाच्या आरोग्यासाठी घरातल्या घरात फक्त सहा मिनिटे चाला! वैद्यकिय अधिकारी सांगतात..
sakal_logo
By
प्रशांत बैरागी

नामपूर (जि.नाशिक) : कोरोनाकाळात फुफ्फुसांचे आरोग्य व्यवस्थित आहे का, याच्या चाचणीसाठी घरातल्या घरात सहा मिनिटे चालण्याची चाचणी (सिक्स मिनिट वॉक टेस्ट) करण्यासाठी आरोग्य विभागाने भर दिला आहे. त्यामुळे संसर्गजन्य आजाराची काही लक्षणे आढळल्यास नागरिकांनी घाबरून न जाता घरगुती चालण्याची चाचणी करावी, असे आवाहन येथील ग्रामीण रुग्णालयाचे वैद्यकीय अधिकारी डॉ. नीलेश सोनवणे यांनी केले आहे.

आरोग्य विभागाकडून जनजागृती; गरजू रुग्णांना त्वरित उपचार शक्य

ग्रामीण भागात सध्या कोरोनाचा प्रादुर्भाव वाढल्याने ग्रामास्थांत भीतीचे वातावरण आहे. कोरोनाच्या विषाणूंनी शरीरात प्रवेश केल्यास सर्वप्रथम फुफ्फुसावर त्याचा परिणाम जाणवतो. त्यामुळे नागरिकांच्या फुफ्फुसाचे आरोग्य चांगले राहावे, यासाठी सहा मिनिटे चालण्याच्या चाचणीबाबत आरोग्य विभागाकडून व्यापक स्वरूपात जनजागृती करण्यात येत आहे. यामुळे नागरिकांना रक्तातील ऑक्सिजनची लपलेली कमतरता लक्षात आल्याने गरजू रुग्णाला वेळेवर रुग्णालयात दाखल करून त्यांच्यावर उपचार करणे सहज शक्य होईल. ताप, सर्दी, खोकला अथवा कोरोनोची लक्षणे जाणवणारे व्यक्ती तसेच गृहविलगीकरणामध्ये असणारे रुग्ण ही चाचणी करू शकतात.

हेही वाचा: गॅंगस्टर रवी पुजारीला पोलिस कोठडी; नाशिक न्यायालयाने सुनावला निर्णय

अशी करा चाचणी

चाचणी करण्यापूर्वी बोटात पल्स ऑक्सिमीटर लावून त्यावरील ऑक्सिजनची नोंद करावी. त्यानंतर ऑक्सिमीटर तसेच बोटात ठेवून घरातल्या घरात सहा मिनिटे चालावे (पायऱ्यांवर चालू नये). यादरम्यान अतिवेगात किंवा हळूहळू चालू नये. मध्यम चालावे. सहा मिनिटे चालून झाल्यानंतर पुन्हा ऑक्सिजनच्या पातळीची नोंद घ्यावी. सहा मिनिटे चालूनही ऑक्सिजनचे प्रमाण कमी झाले नाही, तर तब्येत उत्तम असे समजावे. समजा ऑक्सिजन एक ते दोन टक्क्यांनी कमी होत असेल तर काळजी न करता दिवसातून पुन्हा दोन वेळा अशीच चाचणी करावी. जेणेकरून काही बदल होतो का, ते लक्षात येईल.

हेही वाचा: असे घडले मृत्यूतांडव! नाशिक ऑक्सिजन गळतीची घटना cctv मध्ये कैद; पाहा VIDEO

असे आहेत निष्कर्ष

जर सहा मिनिटे चालल्यानंतर ऑक्सिजनची पातळी ९३ पेक्षा कमी होत असेल, चालणे सुरू करण्यापूर्वी जी पातळी होती, त्यापेक्षा तीन टक्क्यांपेक्षा जास्त घट होत असेल किंवा सहा मिनिटे चालल्यानंतर दम, धाप लागल्यासारखे वाटत असेल तर त्या व्यक्तीला ऑक्सिजन अपुरा पडत आहे, असे समजून त्याला रुग्णालयात दाखल करावे. ज्यांना बसल्याजागीच धाप, दम लागतो, त्यांनी ही चाचणी करू नये. ६० वर्षांहून अधिक वयाच्या व्यक्ती सहा मिनिटांऐवजी तीन मिनिटे चालून ही चाचणी करू शकतात.