Nashik News : शहरातून Covishield गायब; मागणी करूनही शासनाकडून अदखल

नाशिक : चीनमध्ये कोरोनाने हाहाकार माजविला असताना देशभरातदेखील आरोग्य सेवा हाय अलर्ट मोडवर आली आहे. असे असताना मात्र नाशिकमध्ये कोविशील्ड लसीचा खडखडाट असल्याचे दिसून येत आहे. शासनाकडे मागणी करूनही लस पुरवली जात नसल्याने महापालिकेला कोव्हॅक्सिन वरच समाधान मानावे लागत आहे.

मागील दोन वर्षात जवळपास पावणेतीन लाख लोकांना घेरत कोरोनाने जवळपास साडेचार हजार लोकांना मृत्यूच्या कवेत ढकलले. मार्च महिन्यापासून कोरोनाचा आलेख घटत सध्या शून्यावर आला आहे. अशा परिस्थितीमध्ये नाशिक शहर व जिल्ह्यातून कोरोना हद्दपार झाल्याचे समजून नियमित व्यवहार सुरू आहे. (State government ignorance towards covishield vaccine Stock out Nashik NMC News)

हेही वाचा : असं एक गाव, जिथं जमिनीला कान लावला तरी संगीत ऐकू येतं...

परंतु, ज्या देशातून कोरोना व्हायरसचा प्रसार झाला. त्याच चीनमध्ये कोरोनाने सध्या हाहाकार उडविला आहे. चीनच्या परिस्थितीमुळे देशातील आरोग्य यंत्रणा हाय अलर्ट मोडवर आली आहे. कोरोना संसर्गाला प्रतिरोध करणाऱ्या लसीकरण मोहिमेने पुन्हा जोर पकडला आहे.

मात्र, असे असताना नाशिक शहरात कोविशील्डच्या कुप्या मात्र शून्यावर आल्या आहे. वैद्यकीय विभागाच्या माध्यमातून शासनाकडे वारंवार पत्रव्यवहार करूनही दखल घेतली जात नाही. परिणामी लसीकरण थांबले आहे. कोव्हॅक्सिन मात्र उपलब्ध असल्याचे सांगण्यात आले.

कोवीशील्डचे २२ लाख डोस

महापालिकेकडून आत्तापर्यंत कोविशील्डचे २१ लाख ८० हजार ९०५ डोस देण्यात आले आहे. यात पहिला दुसरा व तिसरा या तिन्ही डोसचा समावेश आहे. कोव्हॅक्सिनचे तीन लाख ९१ हजार २४९ देण्यात आले आहेत. स्पुतिनिकचे ११ हजार ८५७ डोस देण्यात आले. १८ ते ४४ वयोगटात आत्तापर्यंत ८९ टक्के नागरिकांनी पहिला तर ७६ टक्के नागरिकांनी दुसरा डोस घेतला बूस्टर डोस घेणाऱ्यांचे प्रमाण अवघे नऊ टक्के आहे.