Nashik Leopard News: नवले मळ्यात वर्षभरात तिसरा बिबट्या जेरबंद

इंदिरानगर : अनेक दिवसांपासून पाथर्डी ग्रामस्थांची झोप उडवणारी मादी बिबट्या मंगळवारी (ता. २६) रात्री अकराच्या सुमारास पिंजऱ्यात जेरबंद झाल्याने ग्रामस्थांनी समाधान व्यक्त केले.

विशेष म्हणजे एका वर्षात गट क्रमांक २१६ मधील नवले मळ्यात हा तिसरा बिबट्या पिंजऱ्यात जेरबंद करण्यात आला आहे. (Third leopard jailed in year in Navle mala Nashik News)

२० नोव्हेंबर २०२२ ला २ वर्षे वयाचा नर आणि मागील महिन्यात याच ठिकाणी ७ वर्षे वयाचा नर बिबट्या पकडला होता.

या ठिकाणी असलेल्या नाल्याच्या उतारावर बिबट्याचे ठसे आढळून आल्याने तसेच काहींना प्रत्यक्ष दर्शनदेखील झाल्याने वनविभागाला माहिती देण्यात आली होती. त्यानुसार पिंजरा लावला होता.

रात्री बिबट्या पिंजऱ्यात जेरबंद झाल्याची माहिती वन विभागाला भाऊसाहेब नवले आणि ग्रामस्थांनी दिली. बुधवारी सकाळी वनपाल अनिल अहिरराव आणि सहकाऱ्यांनी हा पिंजरा येथून हलवला. दरम्यान याच ठिकाणी पुन्हा बिबट्याचे ठसे आढळून आले आहेत.

त्यामुळे अजून एक बिबट्या या भागात खात्रीलायक असल्याचे ग्रामस्थांचे म्हणणे असून, त्या दृष्टीने वन विभागदेखील पाहणी करत आहे. जेरबंद करण्यात आलेल्या मादी बिबट्याचे वय पाच वर्षे असल्याचे अहिरराव यांनी सांगितले.