सायबर चोरट्याचा वृद्धाला १८ लाखांना गंडा

नाशिक, ता. २२ : सायबर भामट्यांनी ७३ वर्षीय वृद्धाला फोन करून, तुमच्या सीम कार्डचा वापर करून धमक्या, खंडणी व अश्लील व्हिडिओ कॉल केल्याचे सांगत मुंबई पोलिस, ईडी आणि एनआयएकडून तपास सुरू असल्याचे धमकावले आणि डिजिटल हाउस अरेस्ट करीत तब्बल १८ लाखांना गंडा घातल्याचा प्रकार उघडकीस आली आहे.

याप्रकरणी नाशिक शहर सायबर पोलिसात अज्ञात सायबर भामट्यांविरोधात गुन्हा दाखल करण्यात आला आहे. शहरातील ७३ वर्षीय वृद्धाच्या फिर्यादीनुसार, गेल्या महिन्यात त्यांच्या मोबाईलवर सायबर भामट्यांनी व्हॉट्सॲप कॉलवरून संपर्क साधला. त्या वेळी संशयिताने ‘डेटा प्राेटेक्शन बाेर्ड ऑफ इंडिया’कडून महावीर सिंग बोलत असल्याचे सांगितले.

वृद्धाच्या मोबाईलमध्ये असलेल्या सीम कार्डचा वापर करून अनेकांना धमकावले जात आहे, खंडणी मागितली जात आहे. अश्लील व्हिडिओ कॉल केला जात असल्याची तक्रार मुंबईतील कुलाबा पोलिस ठाण्यात दाखल असून, या गुन्ह्याचा तपास मुंबई पोलिसांसह ईडी आणि एनआयए या तपास संस्थांकडून केला जात असल्याचे वृद्धाला सांगितले.

यानंतर संशयिताने व्हिडिओ कॉल करीत, सीबीआय कार्यालय, पोलिस ठाणे, बनावट कागदपत्रे व खोटे अटक वॉरंट दाखवून त्यांना अटकेची भीती दाखविली. याप्रकरणी शहर सायबर पोलिसात खंडणीचा गुन्हा दाखल करण्यात आला आहे.