Crop Damage : पावसामुळे टोमॅटो मातीमोल; पिकांच्या नुकसानीमुळे संकट

मनमाड (जि. नाशिक) : सतत पडणारा पाऊस आता नकोसा झाला असून, पिकांचे मोठे नुकसान होत आहे. परिसरातील शेतकऱ्यांसह असंख्य शेतकऱ्यांचे टोमॅटोचे पीक उत्तरा नक्षत्राच्या पहिल्याच दिवशी खराब झाले आहे. (tomato crop damage Crisis due to heavy rain in manmad nashik Latest Marathi News)

सध्या पावसाने धुमाकूळ घातला आहे. हातातोंडाशी आलेला खरीप हंगाम वाया जाण्याची भीती व्यक्त केली जात आहे. इतर फळपिकेही धोक्यात आली आहेत. पिकांवर रोगांचे आक्रमण होत असल्याने महागडी औषध फवारणी करून शेतकरी वैतागले आहेत. जूनच्या प्रारंभपासूनच पावसाने दमदार सुरवात केली होती.

यामुळे शेतकऱ्यांनी खरीप हंगामाची जोरदार तयारी केली होती. मका, बाजरी पिकांबरोबरच फळ शेतीदेखील बहरली होती. मात्र, परतीच्या पावसाने शेती पिकांची नासाडी सुरू केली आहे. टोमॅटो, शिमला, कोबी, फ्लॉवर यासह इतर भाजीपाला पिकांची नासाडी होत आहे. तर अनेक ठिकाणी पिके वाहून गेली आहेत. फळवर्गीय पिकांची फुलकळी कुजून गेली आहे. अतिप्रमाणात पाऊस व पहाटे पडणाऱ्या धुक्यामुळे करपा व इतर रोगांचा प्रादुर्भाव वाढला आहे.

खरीप हंगामातील पीक अंतिम टप्प्यात आहे. मात्र, परतीच्या पावसाने पिकांची नासाडी होत आहे. यामुळे शेतकरी त्रस्त झाला आहे. गेल्या पंधरा दिवसांपासून पावसाचा जोर वाढला आहे. डाळिंब पिकाबरोबरच इतर फळ पिकावर याचा परिणाम दिसून येत आहे. पालेभाज्या व भाजीपाला सडू लागला आहे. उत्पादन खर्चही निघत नसल्याने शेतकऱ्यांची आर्थिक कोंडी झाली आहे.

"पावसाचा धडाका सुरू असल्यामुळे टोमॅटोला काळे डाग पडत असून, खराब टोमॅटो फेकून द्यावे लागत आहे. तर झाडांवर रोगांचा प्रार्दुभाव झाला असून, हातातोंडाशी आलेला घास निसर्गाने हिरावून नेल्याने बळीराजा हतबल झाला आहे. सरकारने मदतीचा हात देण्याची गरज आहे." - श्रावण सांगळे, शेतकरी, बुधलवाडी