विम्याच्या रकमेसाठी विधवा महिलेचा छळ; जीवे मारण्याचा प्रयत्न

चिचोंडी (जि.नाशिक) : मृत पतीच्या विम्याचे पैसे व पीएफमधील (insurance money and pf) दहा लाख रुपये द्यावेत, यासाठी महालखेडा (ता. येवला) येथील विधवा मनीषा संजय नागरे (वय ३६) हिला सासरच्या मंडळीने मारहाण करून तिचा अमानुष छळ केला. गळा दाबून तिला ठार मारण्याचा प्रयत्न केला. ती बेशुद्ध झाली असताना, ती मृत झाली, असे समजून सासरच्या लोकांनी तिला स्वतःच्या कारमधून भिंगारे (ता. येवला) रोडच्या कडेला निर्जनस्थळी टाकून दिले. तसेच तिच्या अंगावरील सोन्याचे दागिने काढून घेतले.

बेशुद्धावस्थेत मनीषा खासगी रुग्णालयात दाखल

सकाळी संबंधित महिलेच्या माहेरच्या लोकांना या घटनेबद्दल कळताच त्यांनी बेशुद्धावस्थेत मनीषाला येवला येथील खासगी रुग्णालयात दाखल केले. तिच्यावर सध्या उपचार सुरू आहेत. मनीषा संजय नागरे यांच्या तक्रारीवरून दीर सुनील नामदेव नागरे, सासू जनाबाई नामदेव नागरे, वंदना सुनील नागरे, मुलगा समर्थ संजय नागरे आणि वाहन चालक सुनील जाधव यांच्याविरोधात गुन्हा दाखल झाला आहे. पोलिस उपनिरीक्षक पाटील तपास करीत आहेत. दरम्यान, संशयितांना अटक करण्यात आलेली आहे.