Nashik : शहरभर ट्रॅफिक जाम

नाशिक : गंगापूर रोडवरील डोंगरे वसतीगृह मैदानावर सुरू असलेले महानुभाव पंथाचे संमेलन आणि केटीएचएम महाविद्यालयाच्या परिसरात मविप्र संस्थेची निवडणुकीची मतमोजणी सोमवारी (ता. २९) सुरू होती.

या दोन्हींचा ताण नाशिक शहरातील वाहतुकीवर होऊन ट्रॅफिक जाम झाली होती. स्मार्ट रोड, रविवार कारंजा, अशोक स्तंभ, शालिमार, गंगापूर रोड या परिसरातील रस्त्यांवर वाहनांच्या लांबच्या लांब रांगा लागल्या होत्या. तर, वाहतूक पोलिसांची वाहतूक सुरळीत करताना चांगलीच दमछाक झाली. (Traffic jam across city Nashik Latest Marathi News)

गंगापूर रोडवरील मराठा विद्या प्रसारक या शैक्षणिक संस्थेच्या संचालक मंडळांची निवडणूक होऊन सोमवारी सायंकाळपर्यंत मतमोजणी सुरू होती. यासाठी जिल्हाभरातून या संस्थेचे सभासद नाशिकमध्ये सकाळपासून दाखल झाले होते. तर, डोंगरे वसतीगृह मैदानावर महानुभाव पंथाचे संमेलन असल्याने राज्यभरातून महानुभाव पंथाचे भाविक शहरात दाखल झाले होते.

सायंकाळी या दोन्ही ठिकाणी एकावेळी गर्दी वाढली. वाहनांच्याही संख्या वाढली. त्याचा ताण शहराच्या अन्य रस्त्यावरील वाहतुकीवर पडल्याचे दिसून आले. जुना मुंबई- आग्रा रोडवर मोठ्या प्रमाणात वाहतुकीची कोंडी होऊन लांबच्या लांब रांगा लागल्या. यामुळे या मार्गावरील सिग्नल व्यवस्था कोलमडून पडली.

तर, या वाहतूक कोंडीत असलेल्या वाहनचालकांना मनस्तापाला सामोरे जावे लागले. अशोकस्तंभ, रविवारी कारंजा, शालिमार चौक, मेहेर सिग्नल, गंगापूर नाका, त्र्यंबक नाका याठिकाणी वाहनाच्या रांगा लागल्या होत्या. त्यात या रस्त्यालगत अनधिकृतपणे पार्क केलेल्या चारचाकी वाहनांची भर पडल्याने वाहतुकीची अजूनच कोंडी झाली.