Nashik Traffic News : निमाणी बसस्थानकाजवळ वाहतूक कोंडी नित्याचीच!

पंचवटी (जि. नाशिक) : अरुंद रस्ता आणि वाढलेली वाहनांची संख्येमुळे जुना आडगाव नाका ते निमाणी या मार्गावरील वाहतूक कोंडी समस्या दिवसेंदिवस वाढत आहे. नुकत्याच शाळा सुरू झाल्याने सेवाकुंज येथे विद्यार्थ्यांना रस्ता ओलांडताना वाहने थांबवावे लागत असल्याने या कोंडीत आणखी भर पडली आहे. (Traffic jams near Nimani bus stand Nashik Traffic News)

हेही वाचा : द मिसिंग टाइल सिंड्रोम ठेवा आपल्यापासून दूर

वाहनांच्या लांबवर रांगा लागत असल्याने पुढे जाण्यासाठी वाहने प्रतीक्षेत थांबलेली असतात. जुना आडगाव नाक्याकडून निमाणी, पंचवटी कारंजा, नाशिक कृषी उत्पन्न बाजार समिती, दिंडोरी नाका, पेठ फाटा आदींकडे जाणारी वाहने याच निमाणी मार्गाने येत असतात. हा मार्ग अत्यंत अरुंद आहे.

सिटीलिंक बस, बाजार समितीत शेतमाल घेऊन जाणारी वाहने तसेच शेतमाल खरेदी करून ते मुंबईला घेऊन जाणारी वाहने, शालेय विद्यार्थ्यांना घेऊन जाणारी वाहने, खासगी वाहने, रिक्षा, दुचाकींची या मार्गाने प्रमाणात वर्दळ असते. आता शाळा सुरू झाल्याने सेवाकुंज येथे विद्यार्थी शाळेत जाताना तसेच शाळा सुटल्यानंतर रस्ता ओलांडताना वाहने थांबविण्याची वेळ येते.

अशावेळी वाहनांची लांबवर रांग लागते. ही कोंडी वाढत थेट निमाणी ते जुना आडगाव नाक्यापर्यंत वाढत असल्याचे दिसते. परिणामी, या गर्दीत अनेकदा अपघात होण्याची शक्यता वाढते. रस्त्यांच्या कडेला थांबविण्यात आलेल्या वाहनांमुळेही या कोंडीत भर पडते.