Latest Marathi News | Water Crisis : धरणात मुबलक; नळाला थेंबथेंब पाणी | Sakal
sakal

बोलून बातमी शोधा

water crisis news

Water Crisis : धरणात मुबलक; नळाला थेंबथेंब पाणी

नाशिक : गत तीन महिन्यांपासून धो- धो बसरणाऱ्या पावसाने शहराला पाणीपुरवठा करणाऱ्या गंगापूरसह अन्य धरणे भरलेली आहेत. मात्र याही परिस्थितीत पंचवटीतील गणेशवाडी भागात अतिशय कमी दाबाने पाणीपुरवठा सुरू असल्याने सणावाराच्या काळात महिला वर्ग त्रस्त आहे. विशेष म्हणजे या भागात सकाळचा पाणीपुरवठा भल्या पहाटे केला जातो, तो सकाळी सहा ते आठ करावा अशी मागणी आहे.

पंचवटीतील गणेशवाडी हा संमिश्र लोकवस्तीचा भाग आहे. हा भाग उंचसखल असल्याने खोलगट भागात अधिक दाबाने व जादावेळ पाणीपुरवठा होतो, परंतु उंच भागात पाणीच पोहचत नसल्याने महिला वर्गाला हंडा दोन हंडे पाण्यासाठी अक्षरश: कसरत करावी लागते. त्यामुळे अनेक महिलांना इतर ठिकाणहून पाणी मिळवावे लागते. सध्या या भागात पहाटे साडेचार पावणेपाचलाच नळाला पाणी सोडले जाते. अनेकवेळा साडेसहा वाजता पाणीपुरवठा बंद होतो, त्याऐवजी सकाळी सहा ते आठ या वेळेत पाणीपुरवठा करावा, अशी मागणी आहे. (Water Crisis in panchavati area Nashik Latest Marathi News)

हेही वाचा: Nashik : शहर-जिल्ह्यात मनाई आदेश लागू

नळाला चक्क गटारीचे पाणी

गत महिन्यात या भागातील अनेक ठिकाणच्या नळाला चक्क गटारीचे पाणी येत होते. येथील महिलांनी याबाबत पाणीपुरवठा विभागाशी संपर्क साधल्यावर व मोठी ओरड झाल्यावर दूषित पाणीपुरवठा बंद झाला, मात्र अद्यापही अनेक भागात सुरवातीला मोठ्या प्रमाणावर गढूळ पाणी येत असल्याच्या महिलावर्गाच्या तक्रारी आहेत. आता गढूळ पाण्याची तक्रार कमी झाली तर नळाला पुरेसे पाणी येत नसल्याच्या तक्रारीत वाढ झाली आहे.

"गणेशवाडीत गत अनेक दिवस गढूळ व दूषित पाणीपुरवठा सुरू होता. आता चांगले पाणी येत असताना योग्य दाबाने पाणीपुरवठा व्हावा." - संगीता सूर्यवंशी, गृहिणी

"या भागात गेल्या कित्येक दिवसांपासून कमी दाबाने पाणीपुरवठा सुरू आहे. एकीकडे सर्वच धरणे फुल्ल असताना पूर्ण क्षमेतेने पाणीपुरवठा व्हावा." - अर्चना पगारे, सहजीवननगर

हेही वाचा: Crime Update : अट्टल दुचाकी चोरट्यांना येवल्यात अटक; 5 गाड्या जप्त