Dhule Crime News : निजामपूरला क्रीडामंडळावर छापा; 4 लाखांचा मुद्देमाल जप्त

Dhule Crime News : निजामपूर (ता. साक्री) येथे सोशल क्रीडामंडळाच्या नावाखाली सुरू असलेल्या जुगारअड्ड्यावर ‘एलसीबी’च्या पथकाने बुधवारी (ता. ६) छापा टाकला. या कारवाईत दहा संशयितांना पकडले.

तसेच रोकडसह चार लाखांचा मुद्देमाल जप्त केला. (Nizampur sports association raided seized 4 lakh worth of goods dhule crime news)

निजामपूरमधील वासखेडी रोडवरील नॅशनल सोशल सांस्कृतिक क्रीडामंडळ येथे काही जण ५२ पत्त्यांच्या कॅटद्वारे तीन पत्तीचा जुगार खेळत व खेळवीत असल्याची माहिती ‘एलसीबी’ला मिळाली. त्यानुसार पथकाने तेथे छापा टाकत दहा जणांना रंगेहाथ पकडले.

त्यात संजय सुदाम जयस्वाल, रवींद्र नारायण पवार, मुस्ताकिन अरमान शहा, दिलीप आसाराम धनगर, बबन उत्तम खलाणे, बारकू वंजी बच्छाव, संदीप भगवान भलकारे, नाजीम जब्बार शहा, दिलीप दगा धनगर, दिलीप शंकर अहिरे (रा. जैताणे, ता. साक्री) यांचा समावेश आहे.

त्यांच्याकडून रोकडसह जुगाराचे साहित्य, मोबाईल व दुचाकी असा एकूण चार लाख सहा हजार ९५० रुपयांचा मुद्देमाल जप्त केला. या प्रकरणी निजामपूर पोलिस ठाण्यात गुन्हा दाखल केला.

पोलिस अधीक्षक श्रीकांत धिवरे व अपर पोलिस अधीक्षक किशोर काळे यांच्या मार्गदर्शनाखाली ‘एलसीबी’चे पोलिस निरीक्षक दत्तात्रय शिंदे, योगेश राऊत, दिलीप खोंडे, देवेंद्र ठाकूर, राजू गिते यांच्या पथकाने ही कारवाई केली.