नाशिक जिल्हा मलेरिया अधिकारी लाच घेताना जेरबंद 

नाशिक : पडताळणीमध्ये एक वेतनवाढ कमी दिल्या गेल्याचे निदर्शनास आल्यानंतर त्याचे बिल मंजूर करण्यासाठी 15 हजार रुपयांची लाच घेणाऱ्या जिल्हा मलेरिया अधिकाऱ्यास रंगेहाथ अटक करण्यात आली. महेंद्र बबनराव देवळीकर असे लाचखोर अधिकाऱ्याचे नाव आहे. लाचलुचपत प्रतिबंधक विभागाच्या पथकाने संदर्भ सेवा रुग्णालयाच्या कार्यालयातच सदरची कारवाई केली. 

तक्रारदाराच्या तक्रारीनुसार, त्यांना 1986 ते 1992 या कालावधीतील एक वेतनवाढ कमी देण्यात आली होती. सदरची बाब तक्रारदार हे 2013 मध्ये निवृत्त झाले असता, त्यावेळी वेतन पडताळणीमध्ये निदर्शनास आली होती. त्यासंदर्भातील फरकाचे बिल जिल्हा हिवताप अधिकारी कार्यालयाकडे मंजुरीसाठी तक्रारदाराने सादर केले होते. तक्रारदाराचे सदरचे बील मंजूर करण्यासाठी लाचखोर जिल्हा हिवताप अधिकारी महेंद्र देवळीकर याने 20 हजार रुपयांच्या लाचेची मागणी केली होती. 
यासंदर्भात तक्रारदाराने आज (ता.16) लाचलुचपत प्रतिबंधक विभागाकडे तक्रार केली होती. त्यानुसार पथकाने शहानिशा केल्यानंतर, आज दुपारी लाचेची 15 हजार रुपयांची रक्कम देण्याचे निश्‍चित करण्यात आले. लाचलुचपत प्रतिबंधक विभागाने संदर्भ सेवा रुग्णालयाच्या आवारात असलेल्या मलेरिया अधिकाऱ्याच्या कार्यालयात सापळा रचला आणि ठरल्याप्रमाणे, लाचखोर महेंद्र देवळीकर यास त्याच्या कार्यालयात 15 हजार रुपयांची लाच स्वीकारताना अटक करण्यात आली आहे. याप्रकरणी भद्रकाली पोलीसात गुन्हा दाखल करण्यात आला आहे.