नातेवाईकांच्या दुःखाचा होतो येथे सौदा, शव घाटावर पोहचवण्यासाठी मागितली एवढी रक्कम

नागपूर : त्रिमूर्तीनगर मार्गावरील खासगी रुग्णालय. ८१ वर्षीय मुकुंद गजभिये यांना शनिवारी उपचारासाठी दाखल केले. ४८ तासांच्या उपचारादरम्यान सोमवारी (ता.७) त्यांचा मृत्यू झाला. दरम्यान कोरोनाबाधित असल्याचा अहवाल आल्याने खासगी रुग्णालयाने नातेवाईकांना तत्काळ शव घेऊन जा, असे निर्देश दिले. नातेवाईकांनी महापालिकेच्या पुढाकारानेच अंत्यसंस्कार करण्यात येतात, ही बाब पुढे केल्यानंतर मात्र खासगी शववाहिकेतून शव हलवा, असे सुचविले. 

कोरोनाबाधित शव स्मशानापर्यंत पोहचण्यासाठी १२ हजार रुपयांची मागणी केली. आप्तस्वकीयाचा मृत्यू झाल्याने नातेवाईक आधीच दुःखी असतात, त्यात शववाहिकांवाल्याकडून असा दुःखाचा सौदा होतो. यापलीकडे एका दिवसात रुग्णालयात ४५ हजार रुपये भरले. यानंतरही शिल्लक १० हजार भरा, तरच शव मिळेल असे खासगी रुग्णालय प्रशासनाने सुनावले. दुःखी नातेवाईकांच्या दुःखाचा असा सौदा होत असल्याने कोरोना काळात माणुसकीची सारी लक्तरे ओरबडून गेल्याचे चित्र नजरेसमोर उभे ठाकले आहे.

हेही वाचा -  पितृपक्ष : ना गाय, ना श्वान श्राद्ध केले की कावळ्यालाच देतात नैवेद्य.. पण का? जाणून घ्या शास्त्रीय कारण
 

कुटुंबातील ज्येष्ठ मार्गदर्शक सोडून गेल्यानंतर सारे नातेवाईक दुःखी होते. अश्रूंचा महापूर येथे वाहात होता. मात्र रुग्णालय प्रशासनाला नातेवाईकांच्या दुःखाशी काही देणेघेणे नाही. त्यांना त्यांचे बिल हवे आहे. एका दिवसाच्या उपचारासाठी ४५ हजार रुपये रुग्णालय प्रशासनाला अदा केले. यानंतरही १० हजार रुपये शिल्लक आहेत, ते वसुली करण्यासाठी नातेवाईकांवर दबाव आणला जातो. 

सोमवारी ४ वाजता मृत्यू झाल्यानंतर रात्रीचे ९ वाजून गेल्यानंतरही शव येथे पडून होते. तर दुसरीकडे कोरोनाबाधित शव अवघे चार किलोमीटर अतंरावरील स्मशानभुमीत पोचवण्यासाठी दुःखी नातेवाइकांशी भाव केला जातो. ४ किलोमीटरसाठी १२ हजार रुपयांचा भाव शववाहिकावाल्यांनी स्वतःच ठरून टाकला. कोरोनाचे शव नातेवाईकांच्या स्वाधीन करता येत नाही. महापालिकेच्या पुढाकारातूनच अंत्यसंस्कार करण्यात येताता. 

अवश्य वाचा - अविश्वसनीय! विदर्भातील या गावात चक्क डायनासोर द्यायचे अंडी: काही वर्षांपूर्वी सापडले होते अवशेष
 

ही माहिती असतानाही रुग्णालय प्रशासनाकडून महापालिकेच्या अधिकाऱ्यांना कळविण्यात येत नाही. नातेवाईकांनाच महापालिकेशी संपर्क साधा असे सुचविण्यात येते. तर खासगी शववाहिकावावाले क्षणात रुग्णालयात कसे हजर होतात? हा प्रश्न उपस्थित होतो. सोमवारी ४ वाजता मृत्यू झाल्यानंतर ९ वाजून गेल्यानंतरही शव येथे पडून होते.

महापालिकेच्या अधिकाऱ्यांचे मोबाईल नुसतेच खणखणत होते...

एकिकडे कोरोनाबाधित व्यक्ती मृत्यू पावल्यानंतर त्या शवाचा चेहरा देखील नातेवाईकांना बघू देत नाही. कोणत्या वेळी अंत्यसंस्कार करतात हे देखील अनेकवेळा कळवण्यात येत नाही. तर दुसरीकडे त्रिमुर्तीनगर चौकातील एका खासगी रुग्णालयात कोरोनाबाधिताचा मृत्यू झाल्यानंतर महापालिकेच्या डॉक्टरांपासून तर अधिकाऱ्यांपर्यंत साऱ्यांना मोबाईलवर संपर्क साधल्यानंतर कोणाकडून दाद मिळत नव्हती. पाच तासांपासून मोबाईलवर संपर्क साधण्याचा प्रयत्न करताना अधिकाऱ्यांचे मोबाईल फोन नुसतेच खणखणत होते, अशी तक्रार नातेवाईकांनी केली. 

संपादन : अतुल मांगे