अन् त्याने बायकोला सोडून पोलिसाचीच केली पिटाई, भांडण सोडविणे पडले महागात

नागपूर :  नवरा-बायकोत सुरू असलेल्या भांडणामुळे त्रस्त झालेल्या वडिलांनी पोलिसांना फोन केला. घटनास्थळावर पोलिस पोहोचल्यानंतर त्यांचा वाद सोडवत असताना युवकाने पत्नीशी भांडण करणे थांबविले आणि पोलिस हवालदाराला झोडपणे सुरू केले. ही घटना आज गुरुवारी साडेनऊ वाजताच्या सुमारास कोलबास्वामीनगरात घडली. या प्रकरणी पोलिसांनी शासकीय कामात अडथळा निर्माण केल्याचा गुन्हा दाखल करून युवकाला ताब्यात घेण्यात आले.

पोलिसांनी दिलेल्या माहितीनुसार, आरोपी नितीन अनिल पारोचे हा पत्नी व आईवडिलासह कोलबास्वामी नगर, हजारीपहाड परिसरात राहतो. आज गुरुवारी सकाळी अनिलचा पत्नीशी वाद झाला. सकाळी आठ वाजतापासून दोघांमध्ये भांडण सुरू होते. दरम्यान, अनिलने पत्नीला दोनदा मारहाण केली. वडिलांवरही मारण्यासाठी धावला. शेजाऱ्यांनी हस्तक्षेप करून वाद मिटविण्याचा प्रयत्न केला असता अनिलने त्यांनाही शिवीगाळ केली. त्यामुळे त्यांनी पोलिस नियंत्रण कक्षाला फोन केला.

वाचा- दोघेही राहत होते लिव्ह-इनमध्ये अन्‌ उचलले टोकाचे पाऊल...

 नियंत्रण कक्षाने पोलिस हवालदार रोनाल्ड मार्टिन अँथोनी (वय 55) यांना घटनास्थळावर पाठवले. पोलिस हवालदार अँथोनी यांनी अनिलची समजूत घालण्याचा प्रयत्न केला. त्याच्या वडिलाशी चर्चा करीत असताना अनिलचा पारा चढला. त्याने थेट हवालदारावर हल्ला केला. अँथोनी यांनी अन्य कर्मचाऱ्यांच्या मदतीने अनिलला गाडीत बसविण्याचा प्रयत्न केला. मात्र, त्यावेळी अँथोनी यांना मारहाण करण्यात आली. शेवटी कसेबसे करून अनिलला पोलिस ठाण्यात आणले. त्याच्यावर शासकीय कामात अडथळा निर्माण केल्याचा गुन्हा दाखल केला.