राष्ट्रवादी म्हणजे आपल्याच विचारांचा पक्ष; फारशी गटबाजी नसल्याने नाराजांचा गोतावळा करणार प्रवेश

नागपूर : मोदींच्या लाटेत भाजपमध्ये गेलेले आणि अडगळीत पडलेले विविध पक्षातील आजी-माजी नगरसेवक लवकरच राष्ट्रवादीत प्रवेश करणार आहेत. यात काही बसप आणि काँग्रेसच्या नगरसेवकांचाही समावेश असल्याचे समजते.

उत्तर नागपूरमधील राष्ट्रवादीच्या कार्यक्रमात काही नगरसेवकांनी निवेदनाच्या बहाण्याने गृहमंत्री अनिल देशमुख आणि खासदार प्रफुल पटेल यांची भेट घेऊन तसे संकेतही दिले आहेत. गटबाजीमुळे काँग्रेसचे कार्यकर्तेही अस्वस्थ आहेत. विकास ठाकरे यांचे नाव घेतले तर पालकमंत्री नितीन राऊत विचारत नाही. राऊतांच्या कार्यक्रमात गेले तर ठाकरे दूर सारतात अशी अवस्था काँग्रेसच्या कार्यकर्त्यांची झाली आहे. त्यामुळे आपल्याच विचारांचा पक्ष, तुलनेत फारशी गटबाजी नसल्याने त्यांना राष्ट्रवादी सुरक्षित वाटत आहे.

अधिक वाचा - नेता असावा तर असा! घेराव घालणाऱ्या शेतकऱ्यांना क्षणात केले शांत

मोदी लाटेत काँग्रेस आणि राष्ट्रवादीचे अनेक कार्यकर्त्यांनी भाजपमध्ये प्रवेश केला होता. त्यापैकी काही पराभूत झाले. तत्कालीन भाजपचे शहराध्यक्ष बदलले. आता त्यांना कोणी विचारत नाही. यात राष्ट्रवादीच्या दक्षिण नागपूरमधील एका युवा नेत्याचाही समावेश आहे. तेसुद्धा स्वगृही परतणार आहेत.

भाजपचे १०८ नगरसेवक निवडूण आल्यानंतर बाहेरून आलेल्यांना कोणी विचारेनासे झाले आहे. पाच वर्षांच्या कार्यकाळात त्यांना कुठलेच पद दिले नाही. कुठल्यास समितीत सामावून घेतले नाही. भाजपमधील असा नाराजांचा गोतावळा राष्ट्रवादीमध्ये येण्याची दाट शक्यता आहे.

राष्ट्रवादीचे प्रदेशाध्यक्ष जयंत पाटील विदर्भाच्या दौऱ्यावर आहेत. एक आणि दोन फेब्रुवारीला शहर आणि ग्रामीणमधील सर्व सहा जिल्ह्यातील पदाधिकारी व प्रमुख कार्यकर्त्यांसोबत वैयक्तिक संवाद साधणार आहे. रेशीमबागेतील जैन कलार भवन येथे सकाळी दहा वाजतापासून बैठक सत्र आयोजित केले आहे.

नागपूर जिल्ह्यातील ताज्या बातम्यांसाठी क्लिक करा

त्यातच कार्यकारिणीची बैठकसुद्धा घेण्यात येणार आहे. यात पाटील महापालिकेच्या निवडणुकीची तयारी आणि इच्छुकांचाही आढावा घेणार आहेत.  सोमवारी पूर्व, पश्चिम, उत्तर तर दोन फेब्रवारीला द.प., मध्य आणि दक्षिण विधानसभा मतदारसंघातील पदाधिकाऱ्यांसोबत जयंत पाटील चर्चा करणार आहेत.