नागपुरात काँग्रेस शहराध्यक्ष बदलणार? राजकीय वर्तुळात रंगली चर्चा; नाना पटोलेंवर सर्वांच्या नजरा

नागपूर  ः महापालिका निवडणुकीपूर्वी काँग्रेस शहराचा अध्यक्ष बदलणार असल्याची जोरदार चर्चा राजकीय वर्तुळात आहे. प्रदेशाध्यक्ष नाना पटोले यांनी सर्वच जिल्ह्यात नवीन कार्यकारिणी स्थापन करण्यास सुरुवात केली आहे. येत्या महिन्यात नागपूरच्या पदाधिकाऱ्यांची बैठक घेण्यात येणार असून अध्यक्षपदासाठी संभाव्य नावांची चाचपणी करण्यात येणार असल्याचे समजते.

आमदार विकास ठाकरे सध्या शहराध्यक्ष आहेत. अध्यक्ष झाल्यानंतर ठाकरे यांनी तयार केलेल्या कार्यकारिणीवरून चांगलाच वाद निर्माण झाला होता. पालकमंत्री नितीन राऊत, माजी मंत्री सतीश चतुर्वेदी यांच्या समर्थकांना कार्यकारिणीतून डावलण्यात आले होते. हा वाद तत्कालीन प्रदेशाध्यक्ष अशोक चव्हाण यांच्यापर्यंत पोहचला होता. मात्र त्यांनी जैस थे ची भूमिका घेतली. त्यामुळे नाराजी आणखीच वाढली. 

'संजय राऊतांनी राष्ट्रवादीच्या प्रवक्त्यासारखी भूमिका मांडली'; नाना...

शेवटी महापालिकेच्या निवडणुकीच्या दरम्यान मोठे वादळ शहरात निर्माण झाले. चव्हाण यांना कार्यकर्त्यांचा रोषाला सामोरे जावे लागले. हसनबाग येथील जाहीर सभेत त्यांच्यावर शाई फेकण्यात आली होती. त्यामुळे सतीश चतुर्वेदी यांनी अनेक महिन्यानंतर निलंबित करण्यात आले होते. या सर्व घडामोडींना चार वर्षे होऊ घातले आहे.

आता महापालिकेची निवडणूक वर्षभरावर येऊन ठेपली आहे. त्यामुळे कार्यकर्ते सक्रिय होऊ लागले आहेत. प्रत्येकजण आपआपल्या गटात कार्यरत आहे. तिकीट मिळेल याची कोणालाच शाश्वती नाही. त्यामुळे प्रत्येकजण सावध पाऊल टाकत आहे. अनेकजण गटबाजीचा ठप्प लागू नये म्हणून शांत बसला आहे. नाना पटोले यांनी लवकरात लवकर बैठक घेऊन नवीन कार्यकारिणी स्थापन केल्यास मोकळेपणा आणि उघडपणे काम करता येईल अशी त्यांची भावना आहे.

आला उन्हाळा! नागपूरसह विदर्भात उन्हाची तीव्र लाट; चंद्रपूर जगातील दुसरे 'हॉट' शहर 

जबाबदारी कोण घेणार ?

नागपूर शहर काँग्रेसवर विकास ठाकरे यांचे वर्चस्व आहे. त्यांच्याकडे कार्यकर्त्यांचा मोठा फौजफाटा आहे. त्यांना डावलणे सोपे नाही. मात्र ते आता आमदार आहेत. त्यामुळे नव्या नेतृत्‍वावर शहराची जबाबदारी सोपवावी, अशी कार्यकर्त्यांची भावना आहे. असे असले तरी सर्वांना चालणारा अध्यक्षपदाचा उमेदवार कोण असा प्रश्न उपस्थित केला असता कोणीच कोणाचे नाव घ्यायला तयार नाही.

संपादन - अथर्व महांकाळ