आला उन्हाळा! नागपूरसह विदर्भात उन्हाची तीव्र लाट; चंद्रपूर जगातील दुसरे 'हॉट' शहर 

नागपूर ः विदर्भात यंदाच्या उन्हाळ्यातील पहिली उष्णलाट आली असून, नागपूरसह सर्वच जिल्ह्यांमध्ये उन्हाचा तडाखा वाढला आहे. मंगळवारी नागपूरच्या तापमानाने ४१.९ अंशांपर्यंत उचांकी उसळी घेतली. तर चंद्रपूर भारतासह संपूर्ण जगातील दुसरे शहर 'हॉट' शहर ठरले. उन्हाची लाट आणखी दोन-तीन कायम राहणार असल्याचे हवामान विभागातर्फे सांगण्यात आले.

हेही वाचा - क्या बात है! आता बॉम्ब निकामी करणार स्वदेशी ‘वॉटरजेट डीसरप्टर'; DRDO चे संशोधक भूपेश परातेंचा...

राजस्थानकडून येणाऱ्या उष्ण वाऱ्यांमुळे मध्य भारतात उन्हाची लाट पसरली आहे. लाटेचा सर्वाधिक प्रभाव विदर्भात दिसून येत आहे. मंगळवारी नागपूरच्या कमाल तापमानात अर्ध्या अंशाची वाढ होऊन पारा ४१.९ अंशांवर गेला. यंदाच्या मोसमातील हे सर्वाधिक तापमान ठरले. चंद्रपूर येथे पाऱ्याने अक्षरशः कहर केला. 

येथे केवळ देशातच नव्हे, तर संपूर्ण जगात दुसऱ्या सर्वाधिक ४३.६ अंशांची नोंद करण्यात आली. भारतात व जगात सर्वाधिक तापमानाची नोंद बारीपाडा (ओडिशा) येथे ४४.६ अंश सेल्सिअस इतकी करण्यात आली. ब्रम्हपुरी येथे ४३ तर अमरावती, गोंदिया आणि गडचिरोली येथेही पारा ४२ च्या पार गेला. 

हेही वाचा - पाणीपुरीत पूर्ण केला शॉर्ट टर्म अभ्यासक्रम; एकाच छताखाली १५ स्वाद; एमबीए झालेल्या अक्षयचे अनोखे...

७ वर्षांपूर्वी चंद्रपूरने गाठले होते ४८ डिग्रीचे शिखर

विदर्भातील तापमानाने आतापर्यंत अनेकवेळा देशात नवनवे उच्चांक नोंदविले आहे. सात वर्षांपूर्वी म्हणजेच २२ मे २०१३ रोजी चंद्रपूरचा पारा तब्बल ४८ डिग्रीवर गेला होता. विदर्भाच्या आतापर्यंतच्या इतिहासातील तो सर्वात उष्ण दिवस ठरला. त्याच्या एक दिवसानंतर (२३ मे रोजी) नागपुरातही कमाल तापमानाने ४७.९ अंशांचा विक्रमी उच्चांक गाठला होता. 

संपादन - अथर्व महांकाळ