बापरे आता हे काय, डोळ्यांतूनही होऊ शकतो कोरोना

नागपूर  : कोविड हा संसर्गजन्य आजार आहे. त्याचा संसर्ग तोंड आणि नाकाप्रमाणेच डोळ्यांमधूनही होतो. ताप, सर्दी, खोकला, श्वास घ्यायला त्रास यांसह डोळे येणे हेसुद्धा कोविडचे एक लक्षण असल्याचे दिसून येत आहे. त्यामुळे डोळ्यांचीही काळजी घ्या, असा सल्ला प्रसिद्ध नेत्र शल्यचिकित्सक तसेच ग्रीन सिटी हॉस्पिटलचे संचालक डॉ. राफत खान आणि प्रसिद्ध नेत्रतज्ज्ञ व नियाक्षी आय हॉस्पिटलचे डॉ. विरल शाह यांनी दिला.

महापौर संदीप जोशी यांच्या संकल्पनेतून नागपूर महानगरपालिका आणि इंडियन मेडिकल असोसिएशनच्या संयुक्त विद्यमाने ‘कोविड संवाद’ या ‘फेसबुक लाइव्ह’ कार्यक्रमात डॉ. राफत खान आणि डॉ. विरल शाह यांनी बुधवारी (ता. ३०) ‘कोविड आणि डोळ्यांची निगा’ या विषयावर मार्गदर्शन केले. यावेळी नागरिकांकडून विचारण्यात आलेल्या प्रश्नांची उत्तरे देत त्यांनी शंकांचे निरसनही केले.

सविस्तर वाचा - ही लक्षणं देतात शरीरातील कमी ऑक्सिजनची पूर्वसूचना; हे उपाय करा आणि मिळवा नैसर्गिक ऑक्सिजन
 

कोविड हा अत्यंत धोकादायक आजार आहे. त्यामुळे त्याला अगदी सहज घेऊ नका. कोविडमुळे ज्या पहिल्या डॉक्टरांचा मृत्यू झाला ते नेत्र शल्यचिकित्सक होते. त्यामुळे डोळ्यांमधून होणारा संसर्ग हा नाक आणि तोंडातून होणाऱ्या संसर्गाएवढाच घातक आहे. डोळ्यांना वारंवार हात लावणे टाळा. 

अनेक जण ‘कॉन्टॅक्ट लेन्स’ लावतात. मात्र, ते लावताना आधीपेक्षा जास्त खबरदारी घेणे गरजेचे आहे. कॉन्टॅक्ट लेन्स लावण्यापूर्वी हात साबणाने स्वच्छ धुवा. सॅनिटायझरचा वापर करून शक्यतो डोळ्यांना हात लावू नका. शक्य असल्यास चष्मा वापरा. स्वत:च्या मताने डोळ्यांबाबत कुठलेही उपचार करू नका. दवाखान्यात जाणे शक्य नसल्यास फोनवरून डॉक्टरांचा सल्ला घ्या, असेही आवाहन यावेळी डॉ. राफत खान आणि डॉ. विरल शाह यांनी केले. 

संपादन  : अतुल मांगे