महाविद्यालयांना दिलासा मिळेल काय? ४० टक्केच प्रवेश; विद्यार्थ्यांचा नामवंत महाविद्यालयांकडे कल

नागपूर : राष्ट्रसंत तुकडोजी महाराज नागपूर विद्यापीठाच्या ऑनलाईन पदवी प्रवेश प्रक्रियेत यंदा केवळ ५० हजारांवर प्रवेश नोंदविण्यात आले आहे. यापैकी ६० टक्के प्रवेश नामवंत महाविद्यालयांमध्ये झाले आहेत. इतर महाविद्यालयांमध्ये केवळ ४० टक्के प्रवेश नोंदविण्यात आल्याची माहिती समोर आली आहे. त्यामुळे पदवी प्रवेशाला प्रशासनाकडून ३० सप्टेंबरपर्यंत मुदतवाढ देण्यात आली आहे.

विद्यापीठाच्या पदवी प्रवेशासाठी १७ जुलैपासून सुरुवात झाली. १७ ऑगस्टला १२ वाजता गुणवत्ता यादी आणि प्रतीक्षा यादी प्रकाशित करण्यात आली. यानंतर २० ते २४ ऑगस्टपर्यंत गुणवत्ता यादीनुसार प्रवेश देण्यात येणार होते.

हेही वाचा - प्यार दिवाना होता है! टिकटॅकवर झाली ओळख, घेतल्या आणाभाका आणि...

२५ ते २८ ऑगस्टदरम्यान प्रतीक्षा यादीतील विद्यार्थ्यांना प्रवेश देण्यात येणार होते. मात्र, कोरोनामुळे बऱ्याच विद्यार्थ्यांनी प्रवेश घेतले नसल्याची बाब समोर आल्याने विद्यापीठाने दोन दिवस म्हणजे ३० ऑगस्टपर्यंत मुदतवाढ देण्यात आली होती.

१ लाख ८ हजार ४०६ विद्यार्थ्यांनी विद्यापीठाच्या संकेतस्थळावर नोंदणी केली. यापैकी ८२ हजार ६३० विद्यार्थ्यांनी माहिती सादर केली. आता यापैकी केवळ ५० हजारांवर विद्यार्थ्यांनी महाविद्यालयात प्रवेश नोंदविले.

यापैकी बहुतांश विद्यार्थ्यांनी नामवंत महाविद्यालयात प्रवेश मिळविले. त्यामुळे इतर महाविद्यालयात अद्यापही ४० टक्केच विद्यार्थ्यांनी प्रवेश घेतला आहे. ३० सप्टेंबरपर्यंत प्रवेशाची मुभा असून, तोपर्यंत या महाविद्यालयांना दिलासा मिळेल काय, हा प्रश्नच आहे.

जाणून घ्या - सत्तावीस वर्षीय युवक स्मशानघाटासमोरून गाडी ढकलत घेऊन जात होता, पुढे...

२० टक्के प्रवेशवाढीसाठी प्रस्ताव थंडबस्त्यात

नामवंत महाविद्यालयांमधील जागा फुल्ल झाल्याने त्यांनी २० टक्के वाढीव जागांसाठी विद्यापीठाकडे प्रस्ताव पाठविले आहे. मात्र, या वाढीव जागांच्या प्रस्तावाला इतर महाविद्यालयांनी विरोध दर्शविला आहे. या महाविद्यालयात प्रवेशासाठी विद्यार्थी मिळत नसताना नामवंत महाविद्यालयांकडून वाढीव जागांची मागणी करणे चुकीचे असल्याचे कारण देण्यात येत आहे.

संपादन - नीलेश डाखोरे