ब्रेकिंग : वाघिणीसह दोन बछड्याची शिकार; उमरेड-कऱ्हांडला- पवनी अभयारण्यातील घटना

नागपूर ः व्याघ्र अभ्यासक आणि वन्यजीव प्रेमींसाठी नवीन वर्ष दुःखद बातमी घेऊन आले. नववर्षाच्या पहिल्याच दिवशी उमरेड-कऱ्हाडला- पवनी अभयारण्यात वाघिणीसह (सी ३) दोन बछड्याची शिकार झाल्याची धक्कादायक बाब उघडकीस आली. यामुळे वन विभागात खळबळ उडाली असून एका शेतकऱ्यांच्या गाईवर वाघिणीने हल्ला करून ठार मारल्यामुळे त्याने चिडून गाईच्या शरीरावर विष टाकल्याचा संशय व्यक्त केला जात आहे.

उमरेड-कऱ्हाडला- पवनी अभयारण्य वाघाच्या दर्शनासाठी ओळखले जाते. त्यामुळे पर्यटकांची गर्दी कायम या अभयारण्यात असते. आज मार्गदर्शकांनी मागण्यासाठी बंद पुकारल्याने त्यांच्याशिवाय पर्यटकांना भ्रमंती करावी लागली. दरम्यान, सायंकाळच्या दरम्यान, या अभयारण्यातील कऱ्हाडला बीट मध्ये एका वाघिणीसह दोन बछड्याचा मृत्यू झाल्याचे वनरक्षकाला गस्त करीत असताना उघडकीस आली. 

नक्की वाचा -'त्यांच्या' गाडीचा हॉर्न ऐकताच महामार्गावर जमतात असंख्य कावळे; याला दातृत्व म्हणावं की मैत्री

त्याने तातडीने वरिष्ठ अधिकाऱ्यांना या घटनेची माहिती देतात वन परिक्षेत्र अधिकारी, विभागीय वनाधिकारी आणि पेंच व्याघ्र प्रकल्पाचे क्षेत्र संचालक डॉ. रविकिरण गोवेकर यांनी घटनास्थळाला भेट दिली. तेव्हा घटनास्थळाच्या शेजारील काही अंतरावर वाघिणीने एका गाईची शिकार केल्याचे लक्षात आले.

या परिसरात पाळीव प्राण्यांना चराईसाठी बंद असताना पाळीव प्राणी परिसरात आल्याने वाघिणीची शिकार झाल्याचा संशय झाल्याचे शक्यता आहे. गाईची शिकार केल्यामुळे चिडलेल्या व्यक्तींनी त्या गाईच्या शरीरावर विष टाकले. विष टाकलेले मास वाघीण आणि बछड्याने खाल्याने मृत्यू झाल्या अंदाज व्यक्त केला जात आहे. याप्रकरणी दिवाकर नागोकर या व्यक्तीला अटक करण्यात आल्याची माहिती वनाधिकाऱ्यांनी दिली.

अधिक माहितीसाठी - ‘माझ्यावर जबाबदारी आहे; परंतु, माझा नाइलाज आहे’ अशी चिठ्ठी लिहून बिल्डरची आत्महत्या

वाघिणींचा मृत्यू कसा झाला आणि शिकाऱ्याचा शोध घेण्यासाठी पेंच व्याघ्र प्रकल्पातील डॉग स्कॉडला बोलविण्यात आले आहे. ताब्यात घेतलेल्या व्यक्तीची चौकशी करण्यात येत असून अधिक शोध घेण्यात येत आहे. याबाबत बोलताना पेंच व्याघ्र प्रकल्पाचे क्षेत्र संचालक व मुख्य वनसंरक्षक रविकिरण गोवेकर म्हणाले, वाघिणीची शिकार विष टाकून करण्यात आलेली आहे. एक जणाला ताब्यात घेतले असून त्याची चौकशी केली जात आहे. उद्या शनिवारी शवविच्छेदन करण्यात येईल.

संपादन - अथर्व महांकाळ