अमानुष कृत्य! फेसबुक फ्रेंडचा महावितरणच्या महिला ऑपरेटरवर हातोड्यानं हल्ला; अंगालाही घेतला चावा 

नागपूर ः प्रेमभंगामुळे निराश झालेल्या आरोपीने महावितरणच्या कार्यालयातच महिला ऑपरेटरवर चाकू व हातोड्यानिशी हल्ला चढविला. तिचे गाल व पोटालाही कडाडून चावा घेतला. तिच्या किंचाळण्याच्या आवाजामुळे अन्य कर्मचारी व परिसरातील नागरिक मदतीसाठी धावून आले. त्यांनीच आरोपीला पकडून पोलिसांच्या स्वाधीन केले. गुरुवारी दुपारी गोदरेज आनंदम येथील महावितरणच्या कार्यालयात ही धक्कादायक घटना घडली.

सचिन कांबळे (३८) रा. सिद्धार्थ कॉलनी, चेंबूर कॅम्प, मुंबई असे आरोपीचे नाव आहे. तो मूळचा नागपूरकर असून नोकरीच्या निमित्ताने मुंबईत स्थायिक आहे. तर ३४ वर्षीय पिडिता वाठोडा मार्गावर वास्तव्यास असून गणेशपेठेतील मॉडेलमील मार्गावरील गोदरेज आनंदम सबस्टेशनमध्ये ऑपरेटर पदावर कार्यरत आहे. 

नक्की वाचा -'त्यांच्या' गाडीचा हॉर्न ऐकताच महामार्गावर जमतात असंख्य कावळे; याला दातृत्व म्हणावं की मैत्री

त्या पतीपासून वेगळ्या राहत असल्याचे कळते. प्राप्तमाहितीनुसार, पिडिता दोघांची फेसबूकवरून मैत्री झाली. अल्पावधीतच त्यांच्यातील मैत्री लग्नाच्या आणाभाका घेईपर्यंत पोहोचली. मात्र, गेल्या काही दिवसांपासून त्यांच्यात बेबनाव निर्माण झाला होता. पीडिताने बोलणे बंद केले. फोनवरून ती प्रतिसाद देत नसल्याने चिडलेला सचिन बुधवारी नागपुरात दाखल झाला. 

झिंगलेल्या अवस्थेतच गुरुवारी दुपारी ३.३० च्या सुमारास तो पीडितेच्या कार्यालयात गेला. त्याने सोबत चाकू व हातोडाही आणला होता. माझ्यासोबत लग्न कर, अशी गळ घालत होता. शाब्दिक बाचाबाचीनंतर त्याने अचानक पीडितेवर हातोडा व चाकू उगारला. घाबरलेल्या पीडितेने बचावासाठी सचिनच्या डोळ्यात बोट टाकले. 

जाणून घ्या - रामदेव बाबा गेले, अंबानी अडचणीत; मिहान, एमआयडीसीत उद्योजकांचा थंड प्रतिसाद

याप्रकाराने गडबडलेल्या आरोपीच्या हातून पीडितेने हातोडी हिसकावीत त्याच्याच डोक्यावर फटका हाणला. यानंतर आरोपीने संतापाच्या भरात तिचे गाल व पोटाला चावा घेत दुखापत केली. लग्न न केल्यास जीवे मारण्याची धमकी देत तिचे डोके भिंतीवर आपटले. या प्रकरणी पीडितेच्या तक्रारीवरून गणेशपेठ पोलिसांनी शासकीय कामात अडथळा निर्माण करण्याचा गुन्हा दाखल करीत आरोपीला अटक केली.

संपादन - अथर्व महांकाळ