क्षुल्लक वाद अन् भरचौकात मांडीवर चाकूनं केला वार; वाचून तुमच्याही अंगाचा उडणार थरकाप  

नागपूर ः  क्षुल्लक वादातून युवकाचा खून करण्यात आला. गुरुवारी दुपारी जुना कामठा मार्गावर अनेकांच्या डोळ्यादेखत ही थरारक घटना घडली. आरोपीला तत्काळ अटक करण्यात आली आहे.

करण अशोक वर्मा (२६) रा. कटरे ले-आउट, गणेशनगर, कळमना वस्ती असे मृताचे तर फैजान मैसुरी (१८) रा. भवानीनगर, कळमनावस्ती असे अटकेतील आरोपीचे नाव आहे. प्राप्त माहितीनुसार करण हा खसगी काम करायचा. फैजान जुना कामठी रोड येथे फेब्रीकेशनचे काम करीत असून गुन्हेगारीवृत्तीचा आहे. मागच्याच महिन्यात त्याला पिस्तूलसह शांतीनगर भागातून अटक करण्यात आल्याची माहिती आहे. 

हेही वाचा - रक्तबंबाळ अवस्थेत शेतात पडून होती तरुणी; काकानं खांद्यावर घेत पायी पार केलं तब्बल ३ किमी अंतर 

गुरुवारी दुपारी या भागात अतिक्रमण निर्मूलनाची कारवाई करण्यात आली. फैजानच्या दुकानापूढे चिकनचे दुकान आहे. पथक येण्यापूर्वी सामानाची आवराआवर सुरू होती. तेवढ्यात चिकन सेंटरचालकाने फैजानला बोलावून चहा आणून देण्याची विनंती केली. तो दुचाकीने चहा घेण्यासाठी पोटे रेस्टॅरेंटमध्ये जात होता. त्याचवेळी मृतक आपल्या दुचाकीने जात होता. रेस्टॉरेंटकडे वळताना फैजानच्या वाहनाचा धक्का करणच्या वाहनाला लागला. त्यावरून दोघांमध्ये वाद उद्‍भवला. 

वाद वाढत असतानाच करणने पडलेला दगड उचलून फैजानवर उगारला. यामुळे फैजान अधिकच चिडला. जवळचा चाकू काढून करणच्या डाव्या मांडीवर खुपसला. तो रक्ताच्या थारोळ्यात कोसळताच फैजान पळून गेला. घटनेनंतर परिसरात बघ्यांची गर्दी उसळली. घटनेची माहिती मिळताच कळमना पोलिसांचा ताफा घटनास्थळी दाखल झाला. 

नक्की वाचा - भरचौकात साजरा केला वाढदिवस, सोशल मीडियावर व्हिडिओ टाकताच घरी पोहोचले पोलिस

तातडीने करणला खासगी रुग्णालयात दाखल करण्यात आले. उपचारादरम्यान मध्यरात्रीनंतर १ वाजता त्याचा मृत्यू झाला. पोलिसांनी घटनेनंतर काही वेळातच आरोपीला अटक केली होती. करणचा मृत्यू होताच कळमना पोलिसांनी खुनाचा गुन्हा दाखल करीत आरोपीला अटक केली. 

संपादन - अथर्व महांकाळ