नागपूर महापालिका निवडणूक: प्रभाग एका की दोन वार्डांचा? महाविकास आघाडीमध्येच मतभेद

नागपूर ः महापालिकेचा प्रभाग एका की दोन वॉर्डाचा हवा या वरून राज्यातील सत्ताधारी महाविकास आघाडीमध्ये मतभेद निर्माण झाले आहेत. शिवसेना आणि राष्ट्रवादीला वॉर्डनिहाय निवडणूक हवी असून काँग्रेसला दोन वॉर्डांचा प्रभाग हवा आहे.

वर्षभरानंतर नागपूर महापालिकेची निवडणूक होऊ घातली आहे. सध्या शहरात चार वॉर्डांचा एक प्रभाग आहे. मागील निवडणुकीत भाजपला प्रभाग पद्धती चांगलीच पोषक ठरली. त्यांचे तब्बल १०८ नगरसेवक निवडूण आले. सर्वात मोठा पक्ष म्हणून ओळखल्या जाणाऱ्या काँग्रेसचा गाडा २९ नगरसेवकांवर अडला. शिवसेना दोन आणि आणि राष्ट्रवादी एका नगरसेवकांवर येऊन ठेपली. आपले अस्तित्व शाबूत राहावे यासाठी महाआघाडीतील तीनही पक्षांनी प्रभागपद्धती रद्द करावी अशी जोरदार मागणी सत्तेवर आल्याबरोबरच केली होती. 

हेही वाचा - क्या बात है! शेतकरीपुत्राची गगनभरारी; बनला पोलिस उपनिरीक्षक;अख्ख्या गावात फटाक्‍यांची आतषबाजी 

महाविकास आघाडीने तसा निर्णयसुद्धा घेतला. विधानसभेत ठरावसुद्धा पारित केला. आता फक्त दोन की एक वॉर्ड एवढाच निर्णय अंतिमक्षणी राज्य सरकारला घ्यायचा आहे. किमान एक जास्तीत जास्त दोन वॉर्डांचा प्रभाग असे विधेयक राज्य सरकारने पारित केले आहे. नागपूर शहरात राष्ट्रवादी आणि शिवसेनेची ताकद मर्यादित आहे. 

काही वस्त्यांमध्येच त्यांचे उमेदवार निवडूण येऊ शकतात अशी परिस्थिती आहे. त्यामुळे दोनचा प्रभाग केल्यास अडचणी येतील, उमेदवार पराभूत होतील अशी भीती इच्छुकांना वाटत आहे. त्यामुळे एकल प्रभागानुसार निवडणूक घेण्याची मागणी शिवसेना आणि राष्ट्रवादीची आहे. दुसरीकडे काँग्रेसला दोन वॉर्डाचा प्रभाग हवा आहे. त्यामुळे अधिक नगरसेवक निवडणूक येतील आणि उमेदवारी वाटप करताना अडचण जाणार नाही असा होरा काँग्रेसचा आहे. याशिवाय महिला उमेदवारीची अडचणही यामुळे दूर होऊ शकते असा दावाही काँग्रेसचा आहे.

हेही वाचा- ‘मतदान का केले नाही, तुमच्यामुळे आम्ही सरपंच होऊ शकलो...

अनेक दिग्गजांची अडचण

महापालिकेत ५० टक्के महिला आरक्षण आहे. त्यानुसार दीडशेपैकी ७५ वॉर्ड महिलांसाठी सोडावे लागणार आहेत. त्यामुळे जागा वाटपाचा स्कोप आधीच संकुचित झाला आहे. महिला आरक्षणामुळे अनेक दिग्गजांची अडचण होऊ शकते. याशिवाय अनुसूचित जाती जमातीचे आरक्षणामुळे अनेक राखीव ठेवावे लागणार आहे. दोनचा प्रभाग राहिल्यास सोयीनुसार पदाधिकारी, विद्यमान नगरसेवक, प्रभागातील दिग्गज उमेदवारांना ॲडजेस्ट करता येऊ शकते. त्यामुळे प्रभाग करताना दोन वॉर्डाचा समावेश करावा, अशी काँग्रेसची मागणी आहे. 

संपादन - अथर्व महांकाळ