तब्बल १२ दिवस उलटूनही मेडिकलमधून पळालेला कैदी फरारच; नागपूरचे स्मार्ट पोलिस ठरताहेत अपयशी

नागपूर ः मेडिकल हॉस्पीटलच्या ट्रामा केयरमध्ये बनलेल्या कोवीड सेंटरमधून पळून गेलेला कुख्यात कैदी नरेश अनकालू महिलांगे (२५, पुंजारामवाडी, गल्ली क्र. १०, कळमना) अद्याप सापडलाच नाही. या घटनेला आतापर्यंत १२ दिवसांचा कालावधी लोटला गेला असून अजुनही पोलिसा त्याचा शोध घेत आहेत.

पोलिसांनी दिलेल्या माहितीनुसार, गेल्या ७ नोव्हेंबरला हुडकेश्‍वर ठाण्याच्या डीबी पथकाने मध्यवर्ती कारागृहातून नरेश महिलांगे याला प्रॉडक्शन वारंटवर ताब्यात घेतले होते. नरेशला कोरोनाची लागन झाली होती. त्यामुळे त्याला मेडिकलमध्ये कोवीड सेंटरमध्ये ठेवण्यात आले होते. त्याच्यावर नजर ठेवण्यासाठी गार्ड ड्युटीवर पोलिस हवालदार अरूण पाटील आणि कर्मचारी राजेंद्र लेंडे यांना तैनात करण्यात आले होते. 

अधिक वाचा - ही दोस्ती तुटायची नाय : दुर्धर आजाराने ग्रस्त मित्राच्या उपचारासाठी गोळा केला साडेपाच लाखांचा निधी

कैदी नरेश याने मेडिकलमधून पळून जाण्याचा प्लान तयार केला. शौचास गेल्यानंतर खिडकीतून पाईपच्या मदतीने तो खाली उतरला आणि फरार झाला. तो फरार होताच एकच खळबळ उडाली. पोलिस हवालदार पाटील आणि लेंडे यांनी त्याच शोध घेतला. वरिष्ठ अधिकारी आणि अजनी पोलिसांना माहिती दिली. कैदी नरेशचा शोध घेण्यासाठी पोलिसांची चार पथके तैनात करण्यात आली आहेत. चारही पथके फरार कैद्याचा शोध घेत आहेत.

कैदी ठरू शकतो कोरोना वाहक

कैदी नरेश महिलांगे हा कोरोना बाधित आहे. उपचार सुरू असतानाच तो पोलिसांना गुंगारा देऊन पळून गेला. सध्या कोरोनाची दुसरी लाट पसरण्याच्या स्थितीत आहे. अशातच हा कैदी कोरोनाचा वाहक ठरू शकतो. पोलिसांच्या एका चुकीमुळे शेकडो लोकांना कोरोनाची लागण होण्याची शक्यता आहे. त्यामुळे या कैद्याला अटक करणे पोलिसांंसमोर मोठे आवाहन आहे.

स्मार्ट पोलिस अपयशी

नागपूर पोलिसांची ख्याती राज्यभर आहे.तसेच नागपूर क्राईम ब्रॅंचची तुलना मुंबई क्राईम ब्रॅंचशी केल्या जाते. मात्र गेल्या १२ दिवसांपासून पोलिसांना मामा बनवून फरार झालेल्या कैद्याचा कोणताही धागादोरा पोलिसांना मिळाला नाही. त्यामुळे स्मार्ट नागपूर पोलिसांच्या कार्यक्षमतेवर प्रश्‍नचिन्ह निर्माण झाले आहे.

जाणून घ्या -थरारक घटनाक्रम : मध्यरात्री घरात शिरले दरोडेखोर; बापलेकावर हल्ला केल्यानंतर शस्‍त्र टाकून काढला पळ

मेडिकलमधून फरार झालेल्या कैद्याचा आम्ही कसोशीने शोध घेत आहोत. कैद्याबाबत काही माहिती आमच्या हाती लागली आहे. त्यावर काम सुरू आहे. लवकरच फरार आरोपीला अटक करण्यात येईल.
- डॉ. अक्षय शिंदे 
(पोलिस उपायुक्त, झोन-४) 

संपादन - अथर्व महांकाळ