बिअरबारमधून रात्री बाहेर काढायचे मद्यसाठा, नंतर घडले असे...

भिवापूर (जि.नागपूर) :  राज्य उत्पादन शुल्क विभागाच्या पथकाने येथील दोन बिअरबारवर छापा घालून तपासणी केल्याने बार व्यावसायिकांत खळबळ उडाली. टाळेबंदीदरम्यान रविवारी (ता. 26) नागपूर येथे पोलिसांनी पकडलेल्या दारूच्या प्रकरणाशी या छाप्याचे "कनेक्‍शन' असल्याची माहिती आहे. बारमधील झडतीची कारवाई बुधवारी दुपारपासून रात्री उशिरापर्यंत सुरू होती.

सविस्तर वाचा  : शौकिनांनो सावधान ! बनावट तंबाखू उठू शकते जीवावर...

उत्पादन शुल्क विभागाच्या अधिकाऱ्यांना आला संशय
टाळेबंदीदरम्यान दाराला सील लावलेले असताना दोन्ही बारमधून मोठ्या प्रमाणात मद्यसाठा बाहेर विकल्या जात असल्याचा संशय उत्पादन शुल्क विभागाच्या अधिकाऱ्यांना होता. दरम्यान, गत रविवारी नागपूर येथे पोलिसांनी मद्यसाठा भरलेली कार जप्त करीत चार आरोपींना अटक केली होती. पकडलेली दारू भिवापूर येथून आणल्याची माहिती आरोपींनी पोलिसांना दिली. या आधारावर मंगळवारी नागपूर पोलिसांनी येथील स्वप्नील बार व किशोरी बारचे मालक असलेल्या स्वप्नील पारवे व त्यांचा मित्र असलेल्या महेश पंजलवार यांची चौकशी केली. नंतर महेश पंजलवार याला अटक करून दारू वाहतुकीसाठी वारण्यात आलेली कार जप्त केली. ही कार स्वप्नील पारवे यांच्या मालकीची असल्याचे समजते. पुढील तपास नागपूर पोलिस करीत असून, या प्रकरणात आरोपींची संख्या वाढण्याची शक्‍यता ठाणेदार जयेश भांडारकर यांनी वर्तविली.

सविस्तर वाचा: ड्रायव्हर पती राहायचा सतत बाहेर...नवविवाहितेने केले असे...

उत्पादन शुल्क विभाग सक्रिय
नागपूर येथील अवैध दारू वाहतुकीचे प्रकरण उजेडात येताच एरवी निद्रावस्थेत राहणारे राज्य उत्पादन शुल्क विभाग खडबडून जागे झाले. निरीक्षक खरे यांनी त्यांच्या पथकासह बुधवारी दुपारी येथील स्वप्नील पारवे यांच्या बारवर धाड टाकली. धाडीत टाळेबंदीच्या वेळेस असलेला स्टॉक व धाडीच्या वेळेस उपलब्ध मद्याचा स्टॉक यांची सखोल माहिती घेण्यात आली. स्वप्नीलनंतर तास कॉलनी येथील किशोरी बारवर छापा घालून तेथील स्टॉक चेक करण्यात आला. दोन्ही बारमधील मद्याच्या स्टॉकमध्ये मोठे अंतर दिसून आले. बुधवारी रात्री उशिरापर्यंत बारमध्ये चौकशी सुरू होती.

सविस्तर वाचा  :  आता व औषध विक्रेत्यांच्या मदतीने कोरोना रूग्णावर नजर..

परवाने होणार रद्‌द?
कोविड-19 चा संसर्ग होऊ नये म्हणून 18 मार्चला जिल्हाधिकाऱ्यांनी जिल्ह्यातील सर्वच किरकोळ व घाऊक मद्यविक्री अनुज्ञप्ती बंद करण्याचे आदेश दिले होते. त्यानंतरही चोरून मद्यविक्री सुरू होती. त्यामुळे राज्य उत्पादन शुल्क अधीक्षक प्रमोद सोनोने यांनी 31 मार्चला सर्व अनुज्ञप्तीधारकांना पत्र देऊन मद्यविक्री बंद करण्याच्या सूचना दिल्या होत्या. सापडल्यास अनुज्ञप्तीधारकाविरुद्ध गुन्हा दाखल करून अनुज्ञप्ती कायमची रद्द करण्यासाठी जिल्हाधिकाऱ्यांकडे शिफारस करण्याच्या सूचनासुद्धा या पत्रात नमूद आहेत. अधीक्षकांच्या पत्राला केराची टोपली दाखवीत पारवे यांची दारूविक्री सुरूच होती. त्यामुळे त्यांच्या दोन्ही बारचे परवाने कायमचे रद्द होण्याची शक्‍यता वर्तविण्यात येत आहे.