विद्यार्थ्यांसाठी दिलासा, संकटकाळात शिष्यवृत्तीचा आर्थिक आधार

काटोल (जि.नागपूर)  :  सुवर्णमहोत्सवी आदिवासी शिष्यवृत्ती योजनेअंतर्गत तालुक्‍यातील 162 शाळेतील 3,558 विद्यार्थ्यांना 45,14,500 रुपये शिष्यवृत्ती थेट विद्यार्थ्यांच्या खात्यात लगेच जमा होणार आहे. कोरोना राष्ट्रीय संकटात पालकांना याचा लाभ मिळणार असून सोशल डिस्टन्सिंगचे पालन करावयाचे असल्याची अधिकृत माहिती सूत्राकडून प्राप्त झाली. महामानव डॉ.बाबासाहेब आंबेडकर यांच्या जन्मदिनाच्या पूर्वसंध्येला तालुक्‍यातील शाळांना शुभवार्ता मिळाली.

अधिक वाचा : महिला का नारळ फोडत नाहीत, तुम्हाला माहित आहे का?

मुख्याध्यापकांच्या खात्यात पैसे
या शिष्यवृत्तीचे पैसे शाळेच्या मुख्याध्यापकांच्या खात्यात वळते करण्यात आलेले आहेत. या शिष्यवृत्तीमुळे कोरोना संकटात आदिवासी कुटुंबांना मदतीचा हात मिळाला आहे. मागील तीन वर्षांपासून ऑनलाइन तांत्रिक अडचणीमुळे शिष्यवृत्ती मिळण्यास अडचण जात होती. यावर्षी शासकीय आदेशानुसार ऑफलाइन पद्धतीने शिष्यवृत्ती फॉर्म भरल्यामुळे लवकर शिष्यवृत्ती मिळाली. मागील शैक्षणिक सत्राची शिष्यवृत्ती यावर्षी देण्यात आलेली आहे. वर्ग 1 ते 4 करिता 1000 रुपये तर 5 वर्ग ते 7 करिता प्रतिविद्यार्थी 1500 रुपये व वर्ग8 ते 10 करिता 2000 रुपये शिष्यवृत्ती प्राप्त होते.

अधिक वाचा : धक्‍कादायक ! 60 हजार लोक बेरोजगार ?

गोवारी आदिवासींना प्रथमच लाभ
सुवर्णमहोत्सवी आदिवासी शिष्यवृत्तीमध्ये गोंड जमातीच्या विद्यार्थ्यांना लाभ मिळत होता. पण, गोवारी समाज वंचित होता. मात्र, सुप्रीम कोर्टच्या आदेशानुसार गोवारी जमातीला आदिवासी दर्जा दिल्यामुळे प्रथमच गोवारी विद्यार्थ्यांना हा शिष्यवृत्तीचा लाभ मिळाला आहे.

अधिक वाचा : नागपुरात अबतक 56, सत्तरीतील वृद्‌धासह एका चिमूकलीला सुद्‌धा कोरोनाची बाधा

ओबीसी शिष्यवृत्तीपासून वंचित
एकीकडे शासनाने आदिवासी शिष्यवृत्ती ऑफलाइन केली. जात प्रमाणपत्राची आवश्‍यकता नव्हती. मुख्याध्यापकांच्या बोनाफाईड प्रमाणपत्रानुसार जमात ग्राह्य धरली. दुसरीकडे या वर्षीपासून सुरू झालेल्या इतर मागास संवर्ग शिष्यवृत्तीकरिता जातीच्या प्रमाणपत्रासह अनेक कागदपत्रांची पूर्तता करण्यात शाळेचा व पालकांना मानसिक त्रास झाला. अद्यापपर्यंत ओबीसी शिष्यवृत्ती मिळाली नाही.

अधिक वाचा :  आठवतं का आपली पहिली भेट कुठे झाली होती ?

आनंदाची बाब
डॉ. आंबेडकर जयंतीच्या शुभ मुहूर्तावर आदिवासी विद्यार्थ्यांना शिष्यवृत्तीचा लाभ मिळणे आनंदाची बाब आहे. शासनाने जास्त कागदपत्रांची मागणी न करता मुख्याध्यापकांच्या बोनाफाईड प्रमाणपत्रावर जमात ग्राह्य धरावी.
राजेंद्र रामहरी टेकाडे
मुख्याध्यापक,
जि. प. प्राथमिक शाळा, आलागोंदी

तरच शैक्षणिक प्रवाहात येईल !
अनुसूचित जमातीचे प्रमाणपत्र सादर करणाऱ्या विद्यार्थ्यांनाच शिष्यवृत्तीचा लाभ मिळाला आहे. ही जमात ग्रामीण भागात मोठ्या प्रमाणात असल्याने जात प्रमाणपत्राअभावी हजारो विद्यार्थी शिष्यवृत्तीपासून वंचित आहेत. शासनाने बोनफाईड प्रमाणपत्राच्या आधारे सरसकट आदिवासी सुवर्णमहोत्सव शिष्यवृत्ती द्यायला हवी तरच ही जमात शैक्षणिक प्रवाहात येईल.
मारोती मुरके
गोवारी जमातीचे अभ्यासक