गावात मरण झाल्यास येथील नागरिकांच्या जीवाचा उडतो थरकाप; मृतदेह स्मशानात नेताना होतात नरकयातना
कोदामेंढी (जि. नागपूर) : माणसाच्या मरणानंतर शेवटचे स्थान म्हणजे स्मशानघाट. येथे रूढीप्रमाणे सोपस्कार पार पाडले जातात आणि मृत व्यक्तीला ‘अलविदा’ केले जाते. मात्र मरणानंतर शेवटची घटका जेथे पार पडते अशा स्मशानघाटामध्ये मृतदेह नेण्यासाठी ग्रामस्थांना नाना नरकयातना सोसाव्या लागत आहे.
तालुक्यातील अडेगाव येथील स्मशानघाट एक किलोमीटर अंतरावर. मागील वर्षी जिल्हा वार्षिक जनसुविधा योजनेअंतर्गत पाच लाख रुपयाचा निधी खर्च करून स्मशानघाटावर जाण्यासाठी सिमेंट रस्ता बनविण्यात आला. सिमेंट रस्ता बनला पण निधी अपुरा असल्याने अर्धवट. सिमेंट रस्ता म्हटले की रस्त्याचे आयुष्य पंचवीस ते तीस वर्ष असे समजल्या जाते. मात्र वर्षभऱ्यातच सिमेंट रस्त्याची गिट्टी उखडू लागली असून भेगा पडल्या.
निकृष्ट दर्जाचे बांधकाम केल्याने ही विदारकता हे सहज पचविण्यासारखे आहे. बांधकाम करताना स्थानिक प्रशासन कोणते सोंग घेऊन होता. त्याचबरोबर संबंधित विभागाचे तांत्रिक अधिकारी यांनी कंत्राटदाराला पाठबळ दिले तरच शक्य झाले हे सहज आहे. म्हणजेच स्मशानघाटातील विकास निधीत देखील खाण्याची नियत सोडत नसतील तर काय म्हणावे !
स्मशानघाटावरील अर्धवट रस्ता, शेड आणि सौदर्यीकरण याकरिता शासनाकडे पंधरा लाखाच्या निधीची मागणी केली असल्याचे ग्रामसेवक राजकुमार गजभिये सांगतात. स्मशानघाटावर मृतदेह नेताना काही अंतर कापल्यानांतर नरकयातना सुरु होतात. रस्त्यावर ठिकठिकाणी मोठमोठे खड्डे पडले असल्याने खांद्यावरील तीढीचा कधी तोल घसरेल याचा नेम नाही. रात्रीच्या सुमारास प्रेत स्मशानात कसे न्यावे, याचा अंदाज लावताच येत नाही.
येथील स्मशानघाट रस्त्याची दुर्दशा याबाबतचे फोटो आणि व्हिडिओ एकाने फेसबुकच्या पानावर टाकल्याने विषय चांगलाच रंगला. गावगाड्यात विरोध होऊ नये आणि कुणाची बदनामी होऊ नये म्हणून एखादा विषयावर अथवा समस्येवर पुढे सरसावून बोलण्याची हिंमत कुणी दाखवीत नाही, हेही विशेष.
गुडघाभर चिखलात फसतो पाय
पावसाळ्यात तर खूप विदारक स्थिती असते. गुडघाभर चिखल तुडवीत कसेबसे प्रेत स्मशानात नेले जाते. बैलाचा पाय चिखलात फसल्यास सरणाची लाकडे कधी घसरतील हेही सांगता येत नाही. स्मशानात प्रेत नेण्यासाठी ग्रामस्थांना चांगलीच कसरत करावी लागते. यावरून स्मशानात काय सुविधा असतील, हे दिसूनच येते. पुढील निधी आल्याशिवाय या रस्त्याची डागडुजी करण्याचे धाडस ग्रामपंचायत प्रशासन दाखविणार की नाही ?
संपादन - अथर्व महांकाळ
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.